3 нче сентябрьдә Казанда Балыкчы бакчасының беренче төзекләндерелгән өлеше ачылачак

Җәмәгать киңлеге ачылган көнне шәһәрлеләр өчен бию мәйданчыгы эшләячәк.

Фото: Денис Гордийко

(Казан шәһәре KZN.RU, 1 нче сентябрь). 3 нче сентябрьдә Казанда Бишбалта бистәсендә Балыкчы бакчасының беренче төзекләндерелгән өлеше ачылачак. Шәһәрлеләр өчен күңел ачу программасы – бию буенча мастер-класс һәм концерт оештырылачак.

17:00 сәгатьтә паркта бию мәйданчыгы эшли башлый, анда теләгән һәркем ретро-бию хәрәкәтләрен өйрәнә алачак. Мастер-класстан соң «Кудри» кавер-төркеме солисты чыгыш ясаячак, дип хәбәр итә Казан Башкарма комитетының Парклар һәм скверлар дирекциясе.

Исегезгә төшерәбез, җәмәгать пространствосын реконструкцияләү быел башланды. Беренче чираттагы эш кысаларында паркның Кызыл Армия урамы ягыннан бер өлеше төзекләндерелде. Эшчеләр тышкы яктырту һәм видеокүзәтү системаларын тоташтырдылар, юл өслеген яңарттылар һәм зур тематик балалар мәйданчыгы булдырдылар. Эш район халкы белән тыгыз элемтәдә алып барылды. Аларның су басу турындагы шикаятьләрен исәпкә алып, булган яшеллеккә зыян салмыйча гына, территориянең вертикаль планировкасы үзгәртелде.

Бакчаны реконструкцияләүнең икенче чиратына киләсе елда керешү планлаштырыла. Балыкчы бакчасында тренажерлар белән спорт зонасы, амфитеатр белән футбол кыры, теннис корты, чаралар уздыру мәйданчыгы барлыкка киләчәк – җәй көне анда ачык һавада фильмнар күрсәтү, ә кышын чыршы кую планлаштырыла.

Шулай ук бакчада яктылыкның үзенчәлекле бизәлеше пәйда булачак – ретростильдә фонарьлар һәм гирляндалар урнаштырылачак. Ремонттан соң төп акцент үзәк объектка ясалачак – балыкчы фонтан-скульптурасын торгызачаклар

Шулай ук укыгыз

Барлык яңалыклар