27 сентябрьдә Казанда «Төнге велофест» узачак

Меңләгән катнашучы шәһәрнең үзәк урамнары буйлап 18 км юл узачак

27 сентябрьдә Татарстан башкаласында 11 нче «Төнге велофест» узачак, ул җәйге велосипед сезонын йомгаклау вакыйгасы булачак. Меңләгән кеше шәһәрнең үзәк урамнары буйлап 18 км юл үтәчәк. Быел фестиваль Бөек Ватан сугышында Җиңүнең 80 еллыгына һәм Ватанны саклаучылар елына багышлана.

18 км озынлыктагы маршрут шәһәрнең үзәк урамнары буйлап салынган, ул дүрт сәгатькә якын дәвам итәчәк. Катнашучылар өчен Казанның Бөек Ватан сугышы тарихына керткән өлеше турында махсус аудиоэкскурсия әзерләнгән, аны хәрәкәт вакытында тыңлап булачак.

«Төнге велофест – гади спорт кына түгел. Бу азатлык, энергия һәм меңләгән кешеләрнең бердәмлеге. Быел без ата-бабаларыбызның батырлыгына хөрмәт күрсәтү өчен тирән тарихи өлеш өстәдек. Бу онытылмас төн булачак, анда һәркем шәһәрне яңа күзлектән күрә һәм аның ритмын тоя алачак», – дип билгеләде Казанның туризмны үстерү комитеты директоры һәм проектны оештыручы Дарья Санникова.

Велосипед узышында катнашырга теләгән һәркем чакырыла; балигъ булмаганнар өлкәннәр белән бергә катнашырга рөхсәт ителә. Велосипед колонналары Ямашев проспектындагы 122б йорт адресы буенча булган парковкадан 22:00 сәгатьтә старт алачак. Катнашучыларны теркәү 27 сентябрьдә 21:30 сәгатькә кадәр ачык булачак.

Ярышның үзеннән тыш, фестиваль кунакларын күңел ачу программасы көтә. Ул үз эченә истә калырлык образлар авторлары өчен бүләкләр белән гадәти булмаган костюмнар конкурсын (катнашу өчен #ночнойвелофест2025 хештегы белән «Вконтакте» төркемендә фото куярга кирәк), «БКЕ» мототрюкачыларының күрсәтмә чыгышларын, «Maximus» клубының күнекиәләшүен, шулай ук «Волга-Волга» кавер-төркеме концертын ала. Финишта велосипедчыларны диджей-сет каршы алачак.

Фестивальнең көндезге программасы 13:30 да «Урам» экстрим-паркы медиатекасында башлана, анда Россия һәм дөнья буйлап велосипедта йөрүләр турында бушлай ачык лекцияләр узачак. Докладчылар – ТР велосипедчылар берлеген гамәлгә куючы Илдус Янышев (ул Азияне яулап алу тәҗрибәсе турында сөйләячәк), велоактивист, «ВелоВалера» каналы авторы Валерий Сморчков (беренче зур сәфәрне ничек планлаштырырга кирәклеге турында практик киңәшләр бирәчәк), велосәяхәтче, «Лесник» каналы авторы Роман Старов (Татарстан матурлыгын тәкъдир итәчәк һәм «Идел сукмагы»н булдыру турында сөйләячәк) һәм модератор, «Хыяллар һәм сәяхәтләр» китабы авторы, «Экскурс ТВ» каналы авторы Тимур Вәлиев (Россиянең иң яхшы велосипед маршрутлары буенча гид тәкъдим итәчәк).

Лекцияләргә кушылу өчен сылтама буенча теркәлү узарга кирәк. Лекторий 27 сентябрьдә 13:30 да башлана.

Исегезгә төшерәбез, «Төнге велофест» үткәрелү сәбәпле, 27 сентябрьдән 28 сентябрьгә каршы төндә берничә урам буенча транспорт хәрәкәтен чикләячәкләр.

Шулай ук укыгыз

Барлык яңалыклар