Ел башыннан бирле татарстанлылар «Халык контроле» системасына 24 мең мөрәҗәгать тапшырган

Республика халкын барыннан да бигрәк территорияләрне төзекләндерү, муниципаль юлларны карап тоту һәм ремонтлау белән бәйле мәсьәләләр борчый.

(Казан шәһәре KZN.RU, 15-нче май). Татарстан халкы ел башыннан бирле «Халык контроле» системасына 24 мең мөрәҗәгать тапшырган. Шуларның 15870-е буенча уңай карарлар кабул ителгән, бу барлык гаризаларның 67%-ын тәшкил итә. Моннан тыш, күрсәтелгән чорда 16953 шәрех һәм 12500 бәя алынган.

ТР Саннар министрлыгы матбугат хезмәте хәбәр иткәнчә, татарстанлылар язгы айларда аеруча актив булган: март аенда - 9272, апрель аенда – 9029 мөрәҗәгать килгән.

Республика халкын барыннан да бигрәк территорияләрне төзекләндерү (10100 гариза), муниципаль юлларны карап тоту һәм ремонтлау (4586 гариза), тышкы реклама өлкәсендәге җитешсезлекләр (1687 гариза) һәм юл хәрәкәтен оештыру (1276 гариза) белән бәйле мәсьәләләр борчыган.

Исегезгә төшерәбез, «Халык контроле» системасы Татарстанда 2012 елдан бирле эшли. Аның мөмкинлекләре ярдәмендә халык һәм җирле хакимият торак-коммуналь хуҗалык, сәламәтлек саклау, төзекләндерү һәм башка өлкәләрдәге мәсьәләләрне хәл итү өчен нәтиҗәле хезмәттәшлек итә ала. Системада республиканың һәр кешесе гариза калдыра ала. Моның өчен ТР Дәүләт хезмәтләре порталында авторизация үтү һәм килеп туган проблеманың төгәл тасвирламасын бирү генә кирәк булачак. Татарстанлыларга уңайлы булсын өчен шулай ук «ТР Халык контроле» мобиль кушымтасы да эшләнгән, аны App Store һәм Play маркеттан күчереп алырга мөмкин.

Шулай ук укыгыз

Барлык яңалыклар