Казанда коронавирус белән авыруның 23 яңа очрагы теркәлгән

Узган тәүлектә Татарстанда 56 очрак расланды.

Фото: Марат Мугинов

(Казан шәһәре KZN.RU, 22-нче февраль). Татарстанда COVID-19 белән авыруның 56 яңа очрагы теркәлгән, барысы да – элемтә аша. 24 кеше хастаханәгә озатылган, 32 кеше өйләрендә дәвалана.

Авыручылар арасында өч балигъ булмаган бала, 4 кеше – 18 яшьтән 30 яшькә кадәр, 17 кеше – 30 яшьтән 50 яшькә кадәр, 7 кеше – 50 яшьтән 60 яшькә кадәр, 9 кеше – 60 яшьтән 70 яшькә кадәр, 10 кеше – 70 яшьтән 80 яшькә кадәр, 5 кеше – 80 яшьтән 90 яшькә кадәр, берсе 90 яшьтән өлкәнрәк.

23 кеше – Казанда, 13 кеше – Чаллыда, өчәр кеше – Әтнә, Әлмәт, Яшел Үзән районнарында, 2 кеше – Тәтеш районында, берәр кеше – Апас, Баулы, Лаеш, Лениногорск, Менделеевск, Нурлат, Саба, Сарман, Чистай районнарында яши.

22-нче февральгә Татарстанда 17 мең 656 СОVID-19 йоктыру очрагы теркәлгән. Пандемиянең бөтен чорында 14 мең 219 кеше савыкты, шул исәптән 3 кеше – узган тәүлектә.

Коронавирустан 71 мең 838 кеше прививка ясаткан (тәүлек эчендә үсеш – 591 кеше), шулардан 13 мең 615 кеше икенче доза алган, дип хәбәр итә ТР Сәламәтлек саклау министрлыгының матбугат хезмәте.

Федераль оператив штаб мәгълүматы буенча, Россиядә тәүлеккә 12 мең 604 яңа авыру очрагы ачыкланган. Илдә барлыгы 4 млн 177 мең 330 кеше авырган, 3 млн 726 мең 388 кеше сәламәтләнгән, 83 мең 630 кеше үлгән.

Шулай ук укыгыз

Барлык яңалыклар