17 августта Казанда сукырлар һәм начар күрүчеләр өчен чираттагы курслар башлана

Бу инде күзләре начар күрә торган инвалидлар өчен бишенче курс булачак.

(Казан шәһәре KZN.RU, 15-нче август). 17-нче августта Казанда «Ярдәм» хәйрия фондының укыту-тернәкләндерү үзәгендә сукырлар һәм начар күрүчеләр өчен дәвалау-тернәкләндерү курслары башлана. Бу инде күзләре начар күрә торган инвалидлар өчен бишенче курс булачак, алар «Йөрәк белән күрү һәм ишетү» проекты кысаларында уздырыла.

Бер ай дәвам итәчәк курсларга традиция буенча Россия Федерациясенең төрле төбәкләреннән, шулай ук Татарстан Республикасының шәһәр-районнарыннан реабилитантлар киләчәк.

Проект Луи Брайль системасы буенча укырга өйрәтү, «Jaws» махсус программасы ярдәмендә компьютер грамоталылыгына өйрәтү, психологик тернәкләндерү, медицина ярдәме, мәдәни программа һәм экскурсия, спорт чаралары, җирлектә ориентлашу буенча дәресләр, йорт эшләрен алып баруга өйрәтү, юридик ярдәм күрсәтү, тернәкләндерү, күрмәүчеләрне эшкә урнаштыруда ярдәм итүне күздә тота. Теләге булган укучылар гарәп графикасын һәм ислам нигезләрен өйрәнә алалар.

Реабилитация курслары финанслашу шартларында - РФ Президентының гражданнар җәмгыятен үстерүгә бирелгән грантыннан файдаланып, «Ярдәм» фондының үз акчалары хисабына уза.

Проект узган елның июнендә старт алды һәм агымдагы елның сентябренә кадәр дәвам итәчәк. Бу вакыт дәвамында гомуми саны 225 кешедән торган биш төркемне укыту планлаштырыла, дип хәбәр иттеләр фондта.

Шулай ук укыгыз

Барлык яңалыклар