13 нче августта Казанда «Төнге велофест» узачак

17 км озынлыктагы маршрут шәһәрнең тарихи өлешен һәм елга аръягы районын колачлый.

Фото: Денис Гордийко

(Казан шәһәре KZN.RU, 1 нче август, Зилә Гайфи). Казанда 13-14 нче август төнендә «Төнге велофест» дигән масштаблы экскурсия узачак, аны быел цифрлаштыру темасына багышлаячаклар. 17 км озынлыктагы маршрут шәһәрнең тарихи өлешен һәм елга аръягы районын колачлый. Анда башка шәһәрләрдә яшәүчеләр дә катнаша ала – велофестка чакыру белән беренче тапкыр Волгоградта, Түбән Новгородта һәм Уфада реклама баннерлары урнаштырылган, шулай ук чара турында Санкт-Петербург халкына сөйләячәкләр.

Бүген Башкарма комитетта узган эшлекле дүшәмбе киңәшмәсендә Казанның туризмны үстерү комитеты директоры Дарья Санникова билгеләп үткәнчә, велосипед мәдәнияте бәйрәме традицион рәвештә күп кенә катнашучыларны, шул исәптән сәламәт яшәү рәвешен яратучыларны да, шәһәр турында яңалык белергә теләүчеләрне дә берләштерә.

Фестивальдә барлык теләүчеләр бушлай катнаша ала. Теркәлү kazan-velofest.ru сайтында 5 нче августта ачылачак, ул 13 нче августка кадәр дәвам итәчәк. Велофестта катнашучыларны җыю 1 нче Май мәйданында 20:00 сәгатьтә башлана, ә төнге велоузышка старт 22:00 сәгатьтә биреләчәк. Параллель рәвештә проектның фирма продукциясен уйнату белән күңел ачу программасы оештырылачак, фуд-корт ачылачак һәм диджейлар чыгыш ясаячак. Чарада фотографлар һәм видеографлар эшләячәк – катнашучыларга иң яхшы фоторәсемнәр өчен тәмле велосетлар бүләк ителәчәк.

Д.Санникова сөйләвенчә, велофест маршруты буенча 3 тукталыш планлаштырылган, алар барышында катнашучылар ял итә һәм ныгый алачак: «Казан» гаилә үзәге, «Ак Барс Арена» стадионы янында һәм Кремль яр буенда. Экскурсия үзе Казан радиостанциясенең 102,8 FM дулкынында туры эфирда узачак.

Велофестны уздыру хокук саклау органнары һәм шәһәрнең ЮХИДИ белән килештерелгән, дип ассызыклады Д.Санникова.