Соңгы тәүлектә Татарстанда СОVID-19 йоктыруның яңа 102 очрагы теркәлгән.

Вирусны йоктыручыларның 28-е Казанда яши.

(Казан шәһәре KZN.RU, 6-нчы май). Татарстанда соңгы тәүлек эчендә коронавирус инфекциясе белән авыруның 102 яңа очрагы теркәлгән. 10 кеше хастаханәгә озатылган, 92 кеше өйдә дәвалана, аларның авырларуы симптомсыз яки җиңел формада уза.

Коронавирус инфекциясе таралуга каршы тору буенча республика оператив штабында хәбәр итүләренчә, читтән алып кайтылган бер очрак бар, калганнары инфекциялеләр белән контакттан соң авырыйлар.

Авыручылар арасында 7 балигъ булмаган бала бар. 40 кеше - 18 яшьтән 30 яшькә кадәр, 23 кеше - 30-дан 50 яшькә кадәр, 20 кеше - 50-дән 60 яшькә кадәр, 9 кеше - 60 яшьтән 70 яшькә кадәр, 2 кеше - 70-тән 80-гә кадәр, бер кеше - 80 яшьтән 90 яшькә кадәр.

75 кеше - Казанда, 6 кеше - Яшел Үзән районында, өчәр кеше - Апас, Буа, Биектау һәм Саба районнарында, икешәр кеше - Арча һәм Лаеш районнарында, берәр кеше - Яр Чаллыда, Югары Ослан, Кукмара, Нурлат һәм Питрәч районнарында.

Узган тәүлек эчендә 20 кеше савыккан, аларның 12-се – Казанда, дүртесе – Лаеш районында, икесе – Әлмәт районында, берәр кеше Азнакай һәм Яшел Үзән районнарында яши.

Республикада яңа коронавирус инфекциясе белән авыручылар арасында дүртенче үлем очрагы расланган. 5-нче майда 1969 елгы Яр Чаллы кешесе вафат булды. 25-нче апрельдән ул үпкәләрне ясалма вентиляцияләү аппаратына тоташтырылган. Йөрәк-кан тамырлары системасының хроник авыруларына ия булган.

6-нчы майга Татарстанда СОVID-19 авыруының 1310 очрагы теркәлгән, 184 кеше сәламәтләнгән. Расланган диагноз белән 405 кеше стационарда ята, шуларның 4-се үпкәләрне ясалма вентиляцияләү аппаратларына тоташтырылган.

Россиядә бер тәүлек эчендә COVID-19 авыруының 10 мең 559 очрагы расланган, шул рәвешле илдә очраклар саны 165 мең 929-га җиткән. 21 мең 327 кеше терелгән, 1537 - үлгән, дип хәбәр итә федераль штаб.

Шулай ук укыгыз

Барлык яңалыклар