Үзизоляция режимы чорында татарстанлылар күбрәк дачага бару өчен йорттан чыга икән

20-нче апрельдә генә дә республика халкы 110 меңгә якын шундый цифрлы рөхсәт сораган.

(Казан шәһәре KZN.RU, 21-нче апрель). Татарстанда үзизоляция режимы гамәлдә булган вакытта өйдән чыгу өчен иң киң таралган сәбәп - дачага бару яки дачадан кайту. Һәр өченче цифрлы рөхсәт диярлек шул максат белән рәсмиләштерелә. Бер көн эчендә, 20-нче апрельдә генә дә республика халкы 110 меңгә якын шундый цифрлы рөхсәт сораган.

Цифрлы рөхсәтләр системасы эшли башлаганнан бирле өйдән чыгуга барлыгы биш миллионнан артык SMS-код соратып алынган. Сервиста 1,2 миллионнан артык татарстанлы теркәлгән.

Моннан тыш, системага республиканың 2,5 меңгә якын үзмәшгуль гражданины кушылган. Әлеге категория өчен өстәмә дүрт максат буенча якынча 6 мең цифрлы рөхсәт бирелгән, дип хәбәр итә ТР Дәүләт идарәсенең, мәгълүмат технологияләренең һәм элемтәсенең цифрлы үсеш министрлыгы матбугат хезмәте.

Исегезгә төшерәбез, 20-нче апрельдән Татарстанда өйдән чыгуга цифрлы рөхсәт алу өчен тагын бер максат барлыкка килде - чәчтарашханәгә бару.

SMS-хәбәрләр яки сайттагы шәхси кабинет аша системада теркәлү узарга һәм цифрлы рөхсәт алырга мөмкин. Татарстанлыларга системада теркәлү һәм урамга чыгуга кодлар алу өчен смс-хәбәрләр җибәрү мәҗбүри түгел. Паспорт мәгълүматларын һәм телефон номерын күрсәтеп, сервиста үз шәхси кабинетыңны булдыру да җитә. Башка ил гражданнары документ сыйфатында яшәүгә рөхсәт кәгазен, миграция картасын яки визаны файдалана ала.

Республикада цифрлы рөхсәтләр алу мәсьәләләре буенча халыкны консультацияләү өчен контакт-үзәк эшләвен дәвам итә. Шалтыратулар кайнар линия буенча кабул ителә: +7(800)250-90-93.

Шулай ук укыгыз

Барлык яңалыклар