Татарстанда ял көннәрендә көчле кар һәм җил көтелә

Юлларда кар көртләре һәм бозлавык булуы ихтимал

Марат Мөгыйнов фотосы

Иртәгә, 31 гыйнварда, Казанда кар, кайбер районнарда буран көтелә. Көньяк-көнбатыштан исәчәк җил, юнәлешен төньяк-көнбатышка үзгәртеп, аның тизлеге секундына 6-11, урыны белән 14 метрга җитәчәк. Төнлә һаваның минималь температурасы -13..-15 градус булачак. Көндез термометрлар -10..-12 градусны күрсәтәчәк. Юлларда бозлавык һәм кар көртләре барлыкка киләчәк.

Гомумән алганда, шимбә көнне Татарстанда юеш, урыны белән көчле кар явачак. Кайбер районнарда буран көтелә, бозлавык булуы ихтимал. Көньяк-көнбатыштан исәчәк җил, юнәлешен төньяк-көнбатышка үзгәртеп, аның тизлеге секундына 6-11, урыны белән 14 метрга җитәчәк. Төнлә термометрның терекөмеш баганасы -5..-10 градуска, көнбатыш һәм төньяк районнарда -11..-16 градуска кадәр түбән төшәчәк. Көндез -3..-8 градус, көнбатыш һәм төньяк районнарда -12 градус салкын булачак. Юлларда кар көртләре, урыны белән көчле бозлавык көтелә.

Татарстанда 1 февральдә болытлы һава торышы фаразлана, урыны белән көчле кар яварга мөмкин. Төньяк-көнчыгыштан исәчәк җил, юнәлешен көньяк-көнчыгышка үзгәртеп, җилнең тизлеге секундына 6-11 метрга җитәчәк. Көндез аның тизлеге секундына 15-17 метрга җитәргә мөмкин, ди синоптиклар. Төнлә термометр баганалары -6..-10 градуска, төньяк һәм көнбатыш районнарда -15 градуска түбән төшәчәк, көндез -3..-8 градус салкын һава торышы көтелә. Юлларда бозлавык һәм кар көртләре булуы ихтимал.

Алдарак көчле кар яву сәбәпле, Казанда «Буран» планы игълан ителүе турында хәбәр җиткерелгән иде. Ул рәсми рәвештә 18:00 сәгатьтән гамәлгә керә. Әлеге карарны гадәттән тыш хәлләр буенча шәһәр комиссиясе кабул иткән.

Шулай ук укыгыз

Барлык яңалыклар