Казанлылар «Эх, чыршысы» акциясе кысаларында 2,5 меңнән артык яңа ел агачын эшкәртүгә тапшырган

Җыелган агачларны территорияләрне төзекләндерү һәм шәһәр халкының хуҗалык ихтыяҗлары өчен йомычкага әйләндерәчәкләр

Фото: Денис Гордийко

Казанда «Эх, чыршысы» экология акциясе тәмамланды, аның кысаларында шәһәр халкы 2,5 меңнән артык чыршы һәм наратны эшкәртүгә тапшырды. 13–31 гыйнвар көннәрендә шәһәр халкы Яңа ел агачларын, алар икенче тормыш алсын өчен, махсус пунктларга китерде. Акция вакытында шәһәрнең барлык районнарында 18 кабул итү ноктасы тәүлек буе эшләде.

Якын арада җыелган барлык ылыслы агачларны шредерда «ПЖКХ» ИК» ҖЧҖ ваклатачак. Табылган агач йомычкасын төзекләндерүгә һәм кабат файдалануга җибәрәчәкләр. Материалның бер өлешен халык шәхси ихтыяҗлары өчен Васильченко урамындагы 6 һәм Родина урамындагы 45 йортлары адресы буенча җыю нокталарыннан бушлай алырга мөмкин (өстәмә даталар хәбәр ителәчәк).

Шулай ук ун капчык йомычканы «Верни в грунт» оешмасына тапшырачаклар. СМУ-88 торак комплексларында кабул итү пунктларында җыелган агачларны идарәче компанияләр территорияләрне төзекләндергәндә кулланачаклар.

Акция Казан мэриясе, «Чиста уеннар – Татарстан» экология хәрәкәте, «ПЖКХ» ИК» ҖЧҖ төбәк операторы һәм СМУ-88 төзүчесе ярдәмендә үткәрелде.

Исегезгә төшерәбез, узган ел Казан халкы 3 мең ылыслы агач җыйды, алар эшкәртелде һәм шәһәр халкына шәхси участоклар өчен тапшырылды.

Шулай ук укыгыз

Барлык яңалыклар