«Черек күл»дә шугалак ясарга әзерләнәләр

Шәһәр халкы бу елны прокат ноктасыннан 370 пар тимераяк алачак

Мария Сысоева фотосы

Казанның «Черек күл» паркында шугалак ясауга һәм тимераякларны прокатка бирү пунктында кышка әзерлек эшләре башланды. Әлегә һава торышы җылы булганлыктан, боз катыру эше кичектерелгәнгә, эшчеләр сулык территориясен һәм инженерлык системаларын тәртипкә китерә: сулык касәсен киптерәләр, агач баскычларны фанер корылма белән каплыйлар, прокатка биреп тору ноктасы белән шугалак арасындагы юлларга резина өслек җәяләр.

Парклар һәм скверлар дирекциясе хәбәр иткәнчә, көчле яңгырлар яуганлыктан, сулык касәсенә яңадан су җыелган. Хәзерге вакытта биредә насос ярдәмендә су суырту эшләре алып барыла. Касә төбе тулысынча пычрактан һәм вак чүп-чардан арындырылачак. Чүпләр калган очракта, шугалакка су агызганда алар калкып чыгарга һәм өслекнең сыйфатын бозарга мөмкин.

Сулык янындагы агач баскычларны нык фанер корылма белән каплаганнар. Әлеге гамәл агач баскычларны тимераяклардан, салкыннан һәм дымнан саклау өчен эшләнгән. Ул шулай ук килүчеләр өчен уңайлы мәйданчык булып хезмәт итәчәк.

Бер үк вакытта прокатка бирү ноктасында да әзерлек эшләре алып барыла: прокатка бирү пункты белән шугалак арасындагы юлларга өлешчә резина өслек җәелгән инде. Шәһәр халкы бу елны прокат ноктасыннан 370 пар тимераяк алып тора алачак.

Температура нольдән түбән төшеп, берничә тәүлек салкын һава торышы сакланганда шугалакта ике этаптан торган боз катыру эшләре башланачак: башта шланглар ярдәмендә касәне су белән тутырачаклар, аннары боз катыру машинасы ярдәмендә каткан боз өслеген тигезләячәкләр.

Исегезгә төшерәбез, бу елны республика башкаласында тимераякта шуу өчен 105 урын: 83 – хоккей тартмасы, шулай ук прокат пунктлары булган 22 шугалак әзерләнә. Казанның спорт үзәкләрендә 200 пар тимераяк яңартылачак.

Шулай ук укыгыз

Барлык яңалыклар