Казанлылар физик затлар мөлкәтенә салымнарны 1 декабрьдән дә соңга калмыйча түләргә тиеш

Бүгенге көндә республиканың берләштерелгән бюджетына 1082 млн сум милек салымы кергән.

Фото: Денис Гордийко

(Казан шәһәре KZN.RU, 8-нче ноябрь, Камилә Гобәйдуллина). 1-нче декабрьгә кадәр казанлылар физик затлар мөлкәтенә салым түләргә тиеш. 2020 ел йомгаклары буенча гомуми күләм 3 млрд 428 млн сум тәшкил итә. Бүгенге көнгә республиканың консолидацияләнгән бюджетына 1082 млн сум милек салымы кергән, шулардан транспорт салымы 552,2 млн сум тәшкил итә, милеккә салым – 409,1 млн сум, җир салымы – 120,7 млн сум. Бу хакта бүген Мэриядәге эшлекле дүшәмбедә Казанның финанс идарәсе башлыгы Ирек Мөхәммәтшин хәбәр итте.

Мөлкәткә салым һәм җир салымы Казан бюджетына, ә транспорт салымы республика бюджетына керә. «Салым органнарының хисабы нигезендә, 2020 елга транспорт салымы буенча түләүләр күләме 1 млрд 707 млн сум тәшкил итте, милеккә салым буенча – 1 млрд 282 млн сум, җир салымы буенча – 439 млн сум. 2019 ел белән чагыштырганда, физик затларның милек салымнарын исәпләүнең гомуми күләме 4 %-ка артты», – диде спикер.

И.Мөхәммәтшин билгеләп үткәнчә, бүгенге көндә Россия Федераль салым хезмәте сайтында салым түләүченең шәхси кабинетында теркәлгәннәр барысы да милек салымнарын түләү кирәклеге турында хәбәрнамә алган, калганнарга почта аша хәбәр ителгән.

Салым түләү кирәклеге турында мәгълүмат дәүләт учреждениеләрендә, подъездларда һәм торак йортларның лифтларында, бистәләрдә, реклама щитларында урнаштырыла, шулай ук мәгълүмати кәгазьләр Казан Башкарма комитетының гражданнар мөрәҗәгатенә җаваплар җибәргәндә хатларга теркәлә.

«Мәгълүмат өчен салымнарны түләү шактый гади дип хәбәр итәм. Моны «Салым түләүченең шәхси кабинеты» «Салымнар түләү» сервисы, «Физик затлар салымы» мобиль кушымтасы, банклар, банкоматлар, почта, түләү терминаллары аша эшләргә мөмкин», –дип йомгаклады Ирек Мөхәммәтшин.