Антон Силуановка Казан Башкарма комитетының «Цифрлы бухгалтерия» проектын тәкъдир иттеләр

Бүгенге көндә Бухгалтерлык хезмәт күрсәтү үзәге 586 социаль-мәдәни учреждениенең эшен алып бара

Фото: ТР Рәисе матбугат хезмәте

(Казан шәһәре KZN.RU, 15 нче декабрь). Россия финанс министры Антон Силуановка һәм Татарстан Республикасы Рәисе Рөстәм Миңнехановка Казанның «Цифрлы бухгалтерия» проектын тәкъдим иттеләр. Инициатива турында Казан Башкарма комитетының Финанс идарәсе башлыгы Ирек Мөхәммәтшин Татарстан Республикасы Финанс министрлыгының, Татарстан Республикасы буенча Федераль салым хезмәте идарәсенең, Татарстан Республикасы буенча Федераль казначылык идарәсенең уртак коллегиясендә сөйләде. Чарада Казан Мэры Илсур Метшин катнашты.

Ирек Мөхәммәтшин Бухгалтерлык хезмәте үзәген булдыру һәм робот технологияләре ярдәмендә процессларны автоматлаштыру турында сөйләде. Казанышлардан документлар әйләнеше тулысынча электрон форматка күчерелгән, ә бухгалтерлар комбинацияле рәвештә читтән торып эшлиләр.

«Без проект бүлеген булдырудан алып бүгенге көндә социаль-мәдәни өлкәдәге 586 учреждение эшен алып баручы мөстәкыйль үзәккә кадәр юл үттек», – дип билгеләп үтте Финидарә башлыгы.

Антон Силуанов һәм Рөстәм Миңнеханов коллегия утырышында катнаштылар. Анда 2023 елда Татарстан Республикасының консолидацияләнгән бюджеты үтәлешенең беренчел йомгаклары һәм 2024 елга финанс, казначылык һәм салым органнарының бурычлары яңгырады.

Татарстан Рәисенең сүзләренә караганда, агымдагы катлаулы шартларда республика икътисадый күрсәткечләр үсешен тәэмин итә алды. Алдан исәпләүләр буенча, Татарстанның тулаем төбәк продукты күләме 4 трлн сум тәшкил итәчәк, 2022 ел дәрәҗәсенә карата чагыштырмача бәяләр үсеше – 102,8 %. Төяп җибәргән продукция күләме 4,5 трлн сум күләмендә көтелә, ә төзелеш эшләре күләме 2022 елга үсеш белән 700 млрд – сум 114%. Төп капиталга инвестицияләр күләме ел йомгаклары буенча 1 трлн сум дәрәҗәсендә бәяләнә, бу 2022 ел дәрәҗәсенә карата 108% тәшкил итәчәк.

«Әлеге күрсәткечләр бу авыр чорда бизнеска ярдәм итү буенча кабул ителгән федераль карарлар ярдәмендә ирешелде. Без Россия Президенты Владимир Путинга һәм ил Хөкүмәтенә рәхмәтле», – дип ассызыклады Рөстәм Миңнеханов.

Татарстан, Россия Финанс министрлыгының социаль-икътисади бәяләмәсе буенча, төп күрсәткечләр буенча федерация субъектлары арасында Мәскәү һәм Санкт-Петербургтан соң – өченче урында, ә инвестицион климат буенча башкаладан гына калышып, икенче урында тора. «Бу төбәктә инвестицион климат формалаштыруга, бизнес өчен шартлар булдыруга игътибар бирелүен күрсәтә. Татарстанда иң прогрессив практикалар, икътисадый үсеш өчен шартлар – монда барысы да эш өчен булдырылган. Кичә Владимир Путин матбугат конференциясендә Рөстәм Миңнехановның «Россия Федерациясе субъектларының иң нәтиҗәле һәм иң яхшы башлыкларының берсе», – дип билгеләп үтте Антон Силуанов.

Россия финанс министры ассызыклаганча, төбәктәге бюджет хәле Россиядә иң яхшыларның берсе. 1 нче декабрьгә Татарстан үз салым керемнәре буенча ил субъектлары арасында бишенче урында тора, шулай ук республикада финанслар белән идарә итүнең сыйфаты яхшы.

Антон Силуанов шулай ук киләсе елда федераль бюджеттан ярдәм дәвам итәчәген хәбәр итте. «Төрле программалар буенча да, инфраструктура проектлары буенча да, ТКХ өлкәсендәге проектларга Илкүләм иминлек фонды акчалары да булачак. Киләсе елда барлык инструментлар да кулланылачак һәм аларны тулысынча эшләп бетерергә кирәк», - дип йомгаклады спикер, аның сүзләрен ТР Рәисе матбугат хезмәте җиткерә.

Фоторепортаж

Видеорепортаж

Шулай ук укыгыз

Барлык яңалыклар