Казанда икенчел чималны кабул итүнең мобиль пункты яңа форматта эшли башлаячак

Кайбер төр калдыкларны акчалата бүләк өчен тапшырырга мөмкин булачак.

Фото: Казан шәһәре KZN.RU

(Казан шәһәре KZN.RU, 24 нче март). 27 нче мартта Казанда эшкәртү өчен икенчел чимал җыю узачак. Шәһәрнең сәүдә үзәкләренең берсендә мобиль пункт яңа форматта эшләячәк.

Беренчедән, мобиль пункт экологик акциядә даими катнашучылар өчен гадәти булган локацияне алыштырды: хәзер ул «Экоутилизация» икенчел чималны кабул итү пункты янында эшли, ул үз чиратында ачык парковкада – Җиңү Проспекты, 141 адресындагы сәүдә үзәгенең машиналар юу урыны һәм почмагы арасында урнашкан. Икенчедән, хәзер чарага теркәлергә кирәкми. Өченчедән, кайбер икенчел чималны «Экоутилизация» пунктына акчалата бүләк өчен тапшырырга мөмкин булачак.

Активистлар йомшак пластик (пакетлар, пленка, азык-төлек һәм ярма төргәкләре, шешә этикеткалары, фасовкалау пакетлары, кием-салым өчен вакуум пакетлар, документлар өчен файллар һ.б.), полипропилен (билгеле бер маркировкалы бер тапкыр кулланыла торган савыт-саба, майонездан бушаган чиләкләр, ләгән, чиләк һ.б.), техник ПЭТ (банкалар, сөт продукциясеннән бушаган ак шешәләр, майдан, азык-төлек һәм көнкүреш химиясеннән бушаган шешәләр), шешә капкачлары, тетрапак төргәкләре, дойпак, кремнардан, теш пасталарыннан, косметикадан бушаган пластик савытлар, пластиктан ясалган каләмнәр, фломастерлар һәм маркерлар, су өчен күмер-пластик фильтрлар, фольга, алюминий консервлары, металл һәм тимер банкалар, эшли һәм эшләми торган вак көнкүреш техникасы, макулатура (чәй, ярма, печенье, көнкүреш техникасыннан һәм косметикадан бушаган тартмалар, гофрокартон), чеклар, кием-салым һәм аяк киеме (куллану өчен яраклы һәм тузган аяк-киемнәрен аерым бүләргә кирәк) һәм башкаларны кабул итәчәк.

Мобиль пунктка нәрсә тапшырырга була һәм икенчел чималны тапшыруга ничек әзерләргә икәнлеге турында тулырак мәгълүматны сылтама буенча белергә була. «Экоутилизация» икенчел чималны кабул итү пунктында акчалата бүләк өчен макулатура, картон, А4 форматындагы кәгазь, алюминий банкалар, металл, техника, шул исәптән компьютер, телефоннар, ПЭТ-шешәләр, стрейч пленкасы һәм ПВД пленкасы кабул ителәчәк.

Мобиль пункт 10:00 дән 12:30 га кадәр эшләячәк, дип хәбәр итәләр оештыручылар.

Шулай ук укыгыз

Барлык яңалыклар