Казан укучылары 3 ай эчендә фандоматлар аша 676 кг икенчел чимал тапшырдылар

Совет районының 72-нче номерлы мәктәбе пластик һәм алюминий савытлар тапшыру буенча лидер булды.

Фото: Денис Гордийко

(Казан шәһәре KZN.RU, 2-нче декабрь). Казан укучылары 3 ай эчендә фандоматлар аша 676 кг икенчел чимал тапшырдылар. Эчемлекләрдән бушаган бөтен җыелган пластик һәм алюминий савытлар сортировка комплексына чыгарыла, анда эшкәртүгә әзерләнә.

Иң күп икенчел чималны - 132 кг ПЭТ һәм 32,5 кг алюминий - 72-нче номерлы мәктәп укучылары тапшырды. Совет районының 167-нче номерлы мәктәбе укучылары 115 кг ПЭТ һәм 12 кг алюминий тапшырдылар. Лидерлар өчлегендә шулай ук Совет районының 181-нче номерлы мәктәбе - монда фандоматлар аша 87 кг ПЭТ һәм 10 кг алюминий җыелган, дип хәбәр итә «ПЖКХ» идарәче компаниясенең төбәк операторы матбугат хезмәте.

Исегезгә төшерәбез, бүгенге көндә эчемлекләрдән бушаган пластик һәм алюминий савытларын кабул итү буенча фандоматлар шәһәрнең 20 мәктәбендә урнаштырылган. Быел мәктәп укучылары өчен уздырылган «Савытлар тапшыр - призлар от» экологик акциясендә катнашучылар самокатлар, мобиль телефоннар, планшетлар һәм сәгатьләр, гироскутерлар һәм уен приставкалары алды.

Фандоматлар калдыкларның 90%-ына кадәр икенчел әйләнешкә кайтарырга мөмкинлек бирә. Алар автоматлаштырылган һәм файдалануның максималь гади логикасына ия. Эчемлекләрдән калган пластик шешәләр һәм алюминий банкаларны берәмләп махсус тәрәзәгә салырга кирәк. Электрон табло кабул ителгән савытның исәбе турында хәбәр итә. Аппаратта штрих-код буенча тараның нинди материалдан - пластик яки алюминийдан ясалуын билгели торган датчиклар урнаштырылган, шуннан соң шешә яки банка махсус секциягә җибәрелә. Банкалар һәм шешәләр азрак урын алып торсын өчен, алар махсус изгеч аша уза, ул аларның күләмен 2 тапкырга киметә. Бер фандомат 800 пластик шешә һәм 0,5 литр күләмендәге 400 алюминий банканы сыйдыра, ягъни бер цикл 25 кг чамасы чимал бирә.

Шулай ук укыгыз

Барлык яңалыклар