Казан марафоныннан соң 35 меңнән артык пластик шешә эшкәртүгә озатылган

Мондый масштабтагы йөгерештә беренче тапкыр эшкәртелми торган төргәк кулланылмаган.

Фото: TIMMERMAN спорт чаралары сериясе матбугат хезмәте

(Казан шәһәре KZN.RU, 17 нче май). Казан марафоныннан соң судан бушаган 35 меңнән артык пластик шешә эшкәртүгә озатылган. Йөгерү маршрутлары буенча, шулай ук фан-зонада пластик җыю өчен махсус баклар урнаштырылган иде.

Дистанциядә су-тоз балансын даими тутыру – йөгереш чараларында катнашучылар өчен мәҗбүри таләп. Быел Казан марафонын оештыручылар пластик шешәләрдәге эчемлекләрне генә кулланырга карар кылган. Бу йөгерүчеләргә уңайлы булсын һәм йөгерештән соң эшкәртелми торган калдыклар санын киметү өчен эшләнгән.

Timmerman спорт чаралары сериясенә нигез салучы, Казан марафоны директоры Вадим Янгиров сүзләренә караганда, ярышларда кәгазь стаканнарны файдаланмау аларның күп катламлы материалдан ясалуы һәм эшкәртүгә начар бирелүләре белән бәйле. «Без массакүләм чаралар үткәргәндә экологик стандартларга өстенлек бирүне бурычыбыз итеп күрәбез», – дип билгеләп үтте ул.

Катнашучыларның пластикны икенчел эшкәртү мөмкинлекләре турында хәбәрдарлыгын арттыру өчен марафонда «Ресайклинг остаханәсе» эшләде. Велошредер ярдәмендә катнашучылар шешәләрнең пластик капкачларын ваклады, ә аннары махсус җиһазларда марафон символикасы төшерелгән брелок ясадылар, дип хәбәр итә Timerman спорт чаралары сериясе матбугат хезмәте.

Казан марафоны Татарстан башкаласында 14 нче һәм 15 нче майда узды, анда Россиянең 81 төбәгеннән һәм дөньяның 17 иленнән 12 меңнән артык кеше катнашты. Абсолют җиңүче булып Федор Шутов танылды. Марафон быел әйләнә-тирә мохитне саклау һәм экологиягә игътибар билгесе астында узды.

Шулай ук укыгыз

Барлык яңалыклар