Иртәгә Татарстан Республикасы Милли музеенда «Мәдәни бердәмлек төне» уздырыла

Башкала халкы һәм кунаклар өчен чаралар бушлай оештырыла

Марат Мөгыйнов фотосы

Иртәгә, 3 ноябрьдә Татарстан Республикасы Милли музее Халыклар бердәмлеге көне уңаеннан шәһәр халкына «Мәдәни бердәмлек төне»нең бай программасын тәкъдим итә. Бу көнне музейда бик күп мәдәни чаралар көтелә, алар барысы да бушлай булачак.

Татарстан Милли музееның конференцияләр залында 11:00 сәгатьтә күренекле татар галиме, язучы һәм этнограф Каюм Насыйрига багышланган «Дөньяларны тоташтыручы» фильмы күрсәтеләчәк. Чара кунакларын 12:30 сәгатьтә, музей экспозицияләре мисалында, Совет чоры һәм советтан соңгы чорның субкультуралары, формаль булмаган бергәлекләре белән таныштырачаклар. 14:00 сәгатьтә музейга килүчеләр өчен «Теге дөнья»да борынгы мисырлыларның хезмәтчеләре» темасына лекция үткәрү күздә тотыла, аннары тавышны яхшырту технологияләре турында сөйләячәкләр.

Моннан тыш, килүчеләр өчен «Музей буримесы. Арес Клиода кунакта» дип аталган әдәби уен оештырылачак. Программа кысаларында шулай ук музыкаль экскурсия үткәрү күздә тотыла. Бу шәһәр халкы өчен үзенчәлекле экспонатлар белән танышу мөмкинлеге булачак, ди оештыручылар. Экскурсиядә борынгы бәрмә уен кораллары һәм аларның хәзерге вакыттагы төрләре күрсәтеләчәк, дип хәбәр итә Татарстан Республикасы Милли музееның матбугат хезмәте.

15:00–17:00 вакыт аралыгында «Мәдәни бердәмлек төне»ндә ханга һәм башка этник авазлар яңгыраячак, 20:00 сәгатьтә исә махсус программа белән халык мирасына яңа сулыш бирүче «РИВАЯТЬ» төрки-татар этно-төркеме чыгыш ясаячак. 21:00 сәгатьтә баянчы Булат Хисмәтов башкаруында халык көйләре яңгыраячак. Диджей Shamil OM ның винил пластинкаларны кулланып яңгыратачак көйләрен ишетергә теләүчеләрне 21:30 сәгатьтә көтеп калалар.

Чараларның тулы исемлеге белән әлеге сылтама аша танышырга була.

«Мәдәни бердәмлек төне» бушлай оештырыла, чарага килергә теләүчеләрне 10:00 сәгатьтән 22:00 сәгатькә кадәр көтәләр.

Исегезгә төшерәбез, Казанда Халыклар бердәмлеге көнен һәм Татарстан Республикасы Конституциясе көнен бәйрәм итүгә багышланган бик күп чаралар оештырылачак. Шәһәр халкы өчен концертлар, лекцияләр, әңгәмәләр, остаханәләр, китап һәм сәнгать күргәзмәләре, әдәби-күңел ачу чаралары уздырылачак.

Шулай ук укыгыз

Барлык яңалыклар