Татарстан башкаласы өченче тапкыр Yokai Matsuri гаилә аниме-фестивален кабул итәчәк

Программада – костюмнар күрсәтү, вокаль чыгышлар һәм паназиат стритфуды

В.И.Ленин исемендәге КДКда 6 сентябрьдә Yokai Matsuri гаилә аниме-фестивале узачак. Шәһәр халкын һәм кунакларын вокаль чыгышлары һәм театр тамашалары белән яңартылган программа көтә.

Аниме-фестиваль – заманча сәнгатьне халык традицияләре белән берләштерүче мәдәни вакыйга. Фестиваль мәйданчыгында 18 номинациядә конкурс узачак, анда фольклор геройлары һәм тарихи персонажлар костюмнарын күрсәтәчәкләр.

Шулай ук катнашучылар этностильдә фан-арт, манга-комикслар һәм AMV-клиплар булдыруда осталыкларын күрсәтәчәкләр. Катнашу өчен сылтама буенча 24 августка кадәр гариза бирергә кирәк.

Аниме-фестиваль кунаклары паназиат стритфудын авыз итә, мастер-классларга кушыла һәм лекцияләр тыңлый алачак, дип хәбәр иттеләр ТР «Алдынгылар хәрәкәте» матбугат хезмәтендә.

Мәдәни вакыйга 12:00 дән 20:00 гә кадәр дәвам итәчәк. Керү – бушлай, тамашачылар өчен теркәлү якын арада ачылачак.

Шулай ук укыгыз

Барлык яңалыклар