8 нче октябрьдән Казанның район администрацияләрендә ташламаларны раслау өчен «Батыр» карталарын бирә башлаячаклар

KZN.RU порталы шәһәрдә нинди ярдәм чаралары гамәлдә булуы һәм алардан ничек файдалану турында белешмәлек әзерләде.

Фото: Денис Гордийко

(Казан шәһәре KZN.RU, 7 нче октябрь). 8 нче октябрьдән Казанның район администрацияләрендә балаларга ташламаларны раслау өчен «Батыр» пластик карталары тапшыра башлаячаклар. Алар ярдәмендә балалар мәдәни һәм спорт учреждениеләренә йөри алачаклар. Җәмәгать транспортында бушлай йөрү өчен транспорт картасы алырга, ә бушлай туклану өчен мәктәптә гариза язарга кирәк булачак. KZN.RU порталы шәһәрдә нинди ярдәм чаралары гамәлдә булуы, алардан ничек файдалану һәм кая мөрәҗәгать итү турында белешмәлек әзерләде.

«Батыр» пластик картасы буенча ташламалар

Батыр пластик картасы түбәндәге мөмкинлекләрне бирә:

1. Мәдәни учреждениеләргә бушлай бару

Ташлама баланың бер өлкән кеше озатуында республика һәм муниципаль мәдәният учреждениеләренә баруына кагыла.

Утырту каралган чараларга билетларны алдан ук броньларга кирәк. Моның өчен чара алдыннан 5 календарь көннән дә соңга калмыйча учреждение кассасына «Батыр» картасы белән мөрәҗәгать итү сорала. Буш урыннар булган очракта, балаларга чарага билетлар биреләчәк.

Урыннар буенча утыртуны күздә тотмаган чараларга алдан бронь ясау кирәк түгел.

Бүгенге көндә 40 мәдәният учреждениесе ташлама бирә.

2. Спорт объектларына бушлай йөрү

Ташлама муниципаль спорт объектларында тренерсыз индивидуаль шөгыльләнүгә кагыла. Бүгенге көндә балалар Казанның 20 учреждениесенә бушлай йөри ала.

«Батыр» пластик карточкасын алу өчен ата-аналарга паспорт, баланың туу турында таныклыгы белән прописка урыны буенча район администрациясенә мөрәҗәгать итәргә кирәк, анда балага серия номеры күрсәтелгән пластик карта биреләчәк:

Авиатөзелеш һәм Яңа Савин районнары администрациясе (Волгоград ур., 32), тел.: +7(843)223-22-33

Вахитов һәм Идел буе районнары администрациясе (Ипподром ур., 14), тел.: +7(843)223-21-11, +7(843)223-21-92

Киров һәм Мәскәү районнары администрациясе (Восстание ур., 82), тел.: +7 (843)223-29-99

Совет районы администрациясе (Шуртыгин ур., 1), тел.: +7 (843)223-20-00.

Мәктәпләрдә ике тапкыр бушлай кайнар аш белән туклану

Ташлама алу өчен ата-анага директор исеменә язмача гариза һәм хәрби комиссариаттан мобилизацияләү турында белешмә белән мөрәҗәгать итәргә кирәк.

Балалар бакчаларына бушлай йөрү һәм анда бушлай туклану

Ташлама алу өчен ата-аналарга балалар бакчасы мөдире исеменә язма гариза белән хәрби комиссариаттан (булган очракта) мобилизацияләү турында белешмә белән мөрәҗәгать итәргә кирәк. Ташлама 1 нче ноябрьдә гамәлгә керә.

Транспортта бушлай йөрү

Җәмәгать транспортында бушлай йөрү өчен балалар транспорт картасы алырга тиеш. Транспорт карталары ата-аналарга, паспорт һәм баланың туу турында таныклыгын күрсәткәндә, үз район администрациясендә бушлай бирелә. Ярдәм чарасы 10 нчы октябрьдән гамәлдә булачак.

Шулай ук «Подросток» яшүсмерләр клублары берләшмәсе яшәү урыны буенча түгәрәкләр һәм секцияләргә өстәмә җыю ачты, 8-800-707-95-47, +7(843)293-80-27 телефоннары буенча язылырга мөмкин.

Түгәрәкләргә һәм студияләргә өстәмә туплау Гайдар исемендәге үзәктә дә (Копылов ур., 7/2) ачык. Студияләр белән танышу һәм язылу администратор аша гамәлгә ашырыла.

Исегезгә төшерәбез, 5 нче октябрьдә Илсур Метшин өлешчә мобилизацияләүгә бәйле социаль-гуманитар мәсьәләләр буенча штаб утырышын уздырды, анда ул мобилизацияләнүчеләрнең гаиләләренә ярдәм итү чараларын әйтте.

Шулай ук укыгыз

Барлык яңалыклар