Бу җәйдә мәктәп яны лагерьларында 15 меңгә якын бала ял итәчәк

Мобилизацияләнүчеләрнең гаиләләрендәге балалар бушлай юлламалар алачак

Фото: Денис Гордийко

(Казан шәһәре KZN.RU, 22 нче май, Татьяна Марюхова). 15 меңгә якын укучы җәйге каникул вакытында мәктәп яны лагерьларында ял итәчәк. Алар 29 нчы майдан 27 нче июньгә кадәр шәһәрнең 146 мәктәбендә эшләячәк. Мобилизацияләнүчеләрнең гаиләләрендәге балалар ташламалы юлламалар алачак. Бу хакта Мэриядә эшлекле дүшәмбедә шәһәр Башкарма комитетының Мәгариф идарәсе җитәкчесе Ирек Ризванов хәбәр итте.

«Безнең чыгарылыш укучылары имтиханнарга әзерләнгәндә, башка укучыларны озын җәйге каникуллар көтә. Бу чорда ата-аналар өчен үз балаларының җәйге ялын оештыру мәсьәләсе кискен күтәрелә, чөнки 3 айны файдалы һәм яхшы уздырырга телиләр. Шуңа күрә мәктәп яны лагерьлары бик популяр», – дип ассызыклады ул.

Аның сүзләренә караганда, 21 көнгә юллама бәясе 4 950 сум тәшкил итә, шуның 742 сумын ата-аналар түли, ә калган өлеше Татарстан Республикасы бюджеты хисабыннан түләнә.

«Мобилизацияләнгән гражданнарның гаиләләренә ярдәм итү максатыннан без хәрбиләрнең балалары өчен мәктәп яны лагерьларына ташламалы урыннар бүлеп бирү мәсьәләсен тикшердек. Алар өчен юллама бушлай булачак. Әлеге хокуктан файдалану өчен ата-аналарга мәгариф учреждениесе администрациясенә мөрәҗәгать итәргә кирәк», – диде Ирек Ризванов.

Мәктәп укучыларын юлда һәм интернет киңлегендә үз-үзләрен дөрес тотулары турында танып белү дәресләре, Милли мәдәниятләр һәм традицияләр елына һәм Педагог һәм остаз елына багышланган викториналар һәм уеннар, шулай ук укучыларны әхлакый тәрбияләүгә юнәлдерелгән тематик чаралар көтә.

«Укучылар өчен әзерләнгән лагерь программасы төрле спорт-танып белү үсеш чараларын һәм уеннарны үз эченә ала, алар тәрбияләнүчеләрнең актив ял итүенә ярдәм итә, ә иң мөһиме, балаларның иҗади сәләтләрен формалаштырачак», – дип ассызыклады Ризванов.

1 нче июньнән 22 нче июньгә кадәр мәктәпләрдә 1 меңгә якын яшүсмер өчен хезмәт бригадалары оештырыла. 15 көн эчендә, йөкләнешкә бәйле рәвештә, алар 6,3 меңнән 7,2 мең сумга кадәр акча алачак.

«Биредә яшүсмерләр белем бирү учреждениеләре территориясендә гади хуҗалык эшләрен башкарачак. Практика күрсәткәнчә, җәйге ялның мондый форматы зур социаль һәм тәрбия эффектына ия: мәктәп укучыларында эшкә җаваплы мөнәсәбәт, бердәмлек һәм шәһәрне чиста тотуга үзләреннән өлеш кертү хисе формалаша», – дип билгеләп үтте Мәгариф идарәсе башлыгы.