Каюм Насыйри йортында төзекләндерүнең беренче этабы төгәлләнде

Агач төзелеш сәнгате һәйкәлендә техник идән асты япмалары, капламнар һәм цоколь катның тышлыгы төзәтелгән

Казанның Париж коммунасы урамында Каюм Насыйри йортын масштаблы төзекләндерүнең беренче этабы тәмамланды. Танылган татар мәгърифәтчесе һәм галиме монда 1902 елда вафат булганчы яшәгән.

Төзекләндерүнең беренче этабы яз көне башланып китте. Агач төзелеш сәнгате һәйкәлендә идән астының техник түшәмәләре, цоколь катның тышлыгы төзәтелгән, дип хәбәр итә Мәдәни мирасны саклау буенча ТР комитеты матбугат хезмәте.

Бинаны торгызу һәм тарихи киртәләр өчен агач материаллары махсуслаштырылган предприятиедә эшләнә.

Проект буенча агачтан уеп ясалган аермалы йортның тарихи кыяфәте торгызылачак, түбә корылмасы көчәйтеләчәк, эчке инфраструктура яңартылачак һәм янәшәдәге территория төзекләндереләчәк.

Элегрәк хәбәр ителгәнчә, «Том Сойер Фест – Казан» волонтерлары Большая урамындагы 65 нче агач йортны яңартканнар иде. Бу Адмиралтейство бистәсендә тарихи мохитне торгызу буенча фестивальнең беренче проекты булды.

Шулай ук укыгыз

Барлык яңалыклар