Казанда БРИКС илләре уеннарына 39 йортның фасадын ремонтлау 18,6% ка башкарылган

Эшләрне 1 нче июньгә тәмамлау планлаштырыла

Фото: Вахитов һәм Идел буе районнары администрациясе

Казанда күпфатирлы 39 йортның фасадын ремонтлау 18,6% ка башкарылган. Эшләр 1 нче апрельдә башланды, аларны 1 нче июньгә – БРИКС илләре уеннарына тәмамлау планлаштырыла. Халыкара ярышлар ТР башкаласында 11-24 нче июньдә узачак. 8,7 мең кеше яшәгән йортларның фасадларын ремонтлауга 393 млн сум акча бүлеп бирелгән.

Ремонтланачак йортларның күбесе Вахитов һәм Идел буе районнарында урнашкан (барлыгы 31 объект), калган эшләр Яңа Савин һәм Мәскәү районнарында башкарылачак. Атап әйткәндә, Н.Ершов, Большая Красная, Лобачевский, Пушкин, Театр, Вишневский, Карл Маркс, Петербург, Кремль, Галактионов, Сул як Болак, Уң як Болак, Бутлеров, Париж Коммунасы, Н.Назарбаев, Университет, Павлюхин, А.Хәйруллин, Агрономия, Халев, Академик Парин, Декабристлар, Чистай урамнарындагы һәм Ибраһимов проспектындагы йортларның фасадлары яңартылачак.

Ремонтлана торган йортлар арасында дүрт мәдәни мирас объекты да бар. Аларның берсе (Театр урамы, 5) 1956 елда төзелгән. Биредә берничә ел җырчы һәм режиссер Нияз Даутов яшәгән.

Большая Красная урамындагы 59 нчы йорт 1935 елда төзелгән. Анда 30 ел татар галиме, тел белгече, профессор Мөхәммәтхан Фазлуллин гомер иткән.

Тагын бер мәдәни мирас объекты Пушкин урамы, 58 адресы буенча урнашкан. 1952 елда төзелгән бина Казанның ул вакыттагы әйдәп баручы архитекторларының берсе – Рәшит Мортазин тарафыннан проектланган.

Дүртенче мәдәни мирас объекты – Лобачевский урамындагы 12/32 нче йорт. Ул 1917 елда төзелгән, анда 10 ел дәвамында композитор Солтан Габәши яшәгән.

Кайбер йортларда ремонт өлешчә үткәреләчәк, төп эшләр исемлегенә фасадларны буяу, шома стеналарны реставрацияләү, ярыкларны тутыру, цокольләрне һәм балконнарны яңарту кергән. Ике йортта, фасадлардан тыш, түбәләр дә төзекләндереләчәк. Якын арада Халев урамындагы йортларда зур эшләр башланачак, аларда балкон экраннары урнаштыру планлаштырылган, дип хәбәр иттеләр Казан Башкарма комитетының торак-коммуналь хуҗалык комитетында.

Өч йорт халкы, яңартылган фасад белән бергә, «Безнең ишегалды» республика программасы буенча төзекләндерелгән территорияле дә булачак.

Шулай ук укыгыз

Барлык яңалыклар