Казанда мошенниклар курьеры тоткарланган

Казанда полиция хезмәткәрләре мошенниклыкка катнашы булган 32 яшьлек җирле кешене тоткарлаган. Сәбәбе өлкән яшьтәге казанлының белдерүе булган, ул билгесез кешеләр алдау схемасыннан файдаланып, аннан 100 мең сум, 2 мең доллар һәм 50 евро урлаганнарын хәбәр иткән.

Зыян күрүче сүзләренчә, аңа билгесез кешеләр шалтыраткан һәм аның акчалары куркыныч астында, дип ышандырганнар. Акчаларны «куркынычсызландыру» өчен алдакчылар акчаның «чынлыгын тикшерергә» дип, курьерга тапшыруны таләп иткәннәр, акчаларны өч сәгатьтән кайтарырга вәгъдә биргәннәр. Ышанучан ир-ат таләпләрне үтәгән. Шуннан соң мошенниклар элемтәгә чыгудан туктаган. Үзенең аферачылар корбаны булуын аңлап, ул Россия Эчке эшләр министрлыгының Казан буенча идарәсенең «Савиново» полиция бүлегенә мөрәҗәгать иткән.

Хокук саклау органнары хезмәткәрләре оператив рәвештә курьерның шәхесен ачыклаганнар. Җинаятьче җинаять схемасында катнашуын таныган. Тоткарланучыга карата РФ Җинаять кодексының 159 «Мошенниклык» маддәсе буенча җинаять эше кузгатылган. Тикшерү вакытында суд аңа читкә китмәү турында язу рәвешендә чик кую чарасын сайлаган. Тикшерү дәвам итә, дип хәбәр иттеләр Казан буенча Эчке эшләр министрлыгы матбугат хезмәтендә.

Исегезгә төшерәбез, куркыту һәм «акча тикшерү» белән мошенниклыкның мондый схемалары киң таралган. Полиция гражданнарны саклык акчаларын өченче затларга бирмәскә һәм һәрвакыт мәгълүматны яңадан тикшерергә чакыра.