Татарстанда күпфатирлы торак йортларны капиталь ремонтлау 35%-ка үтәлгән

Быел республикада капиталь ремонт программасына барлыгы 942 йорт кертелгән.

(Казан шәһәре KZN.RU, 10-нчы июнь, Алинә Бережная). Бүгенге көндә Татарстанда күпфатирлы торак йортларны капиталь ремонтлау программасы буенча эшләр 35%-ка башкарылган. Быел барлыгы 942 йорт ремонтланачак. Бу хакта бүген журналистларга «Главинвестстрой РТ» дәүләт казна учреждениесе директоры урынбасары Айрат Әбүзәров капремонт программасына кертелгән объектларның берсен - Декабристлар урамы, 112 адресы буенча урнашкан йортны карау барышында сөйләде.

Декабристлар ур., 112 адресы буенча урнашкан йортта ремонт эшләре апрель аенда башланды. Ай ярым эчендә биредә йорт эчендәге системалар, инженерлык челтәрләре алыштырылган, хәзер эшчеләр фасадны ремонтлауга һәм балконнарны буяуга керешәләр. Айрат Әбүзәров сөйләгәнчә, бер йортны капиталь ремонтлау уртача 4-5 айга якын сузыла.

Быел республикада капиталь ремонт программасына барлыгы 942 йорт кертелгән. Эшләрнең бәясе 5,8 млрд сум тәшкил итәчәк.

«Хәзерге вакытта без сезонлы эшләр графигыннан 40%-ка алда барабыз. Эшлисе эшләр күп әле. Инженерлык челтәрләрен алмаштыру, фасадны һәм түбәне ремонтлау белән бәйле эшләрнең төп төрләре җәй ахырына кадәр тәмамланачак», - дип аңлатты А.Әбүзәров.

Шулай ук укыгыз

Барлык яңалыклар