Казан паркларында кафелар, рестораннар һәм прокат пунктлары вакытлыча ябыла

Шәһәр паркларында һәм скверларында планлаштырылган барлык чаралар да соңрак вакытка күчерелә.

(Казан шәһәре KZN.RU, 27-нче март). Казанда җәмәгать урыннары территориясендә кафе, ресторан, прокат пунктлары һәм башка объектлар эше туктатыла. Коронавирус инфекциясе таралуны профилактикалау белән бәйле чикләүләр 28-нче марттан 5-нче апрельгә кадәр гамәлдә булачак.

Шәһәр паркларында һәм скверларында планлаштырылган барлык чаралар да соңрак вакытка күчерелә.

Иҗтимагый киңлекләр территориясендә парклар кунакларының куркынычсызлыгын тәэмин итү буенча өстәмә чаралар күрелде: бәдрәфләрдә антибактериаль сабын бар, ә металл өслекләрне (тоткычлар, турниклар һәм балалар мәйданчыклары) дезинфекция чаралары белән ешрак эшкәртәләр, дип хәбәр итә Парклар һәм скверлар дирекциясе. Шуңа да карамастан, шәһәр халкына иҗтимагый киңлекләргә, бигрәк тә балалар һәм спорт мәйданчыкларына чыгуны азайтырга, башка кешеләр белән дистанцияне сакларга һәм ешрак кулларны юарга тәкъдим ителә.

Парк объектларының эше турында мәгълүматны кайнар линия телефоны аша белергә була: +7(843)239-44-33. Шалтыратулар 9.00-дән 18.00-гә кадәр кабул ителә. Шулай ук җәмәгать киңлекләренә кагылышлы барлык сорауларга да җавапларны Парклар һәм скверлар дирекциясенең социаль челтәрләрдәге битеннән алырга мөмкин.

Шулай ук укыгыз

Барлык яңалыклар