Октябрь аенда Вересаев, Ударная, Пржевальский һәм Камчатка урамнарында юл хәрәкәтен оештыру схемасы үзгәрәчәк

Бу тыгынлык ситуацияләрен киметергә һәм юлларның үткәрү сәләтен арттырырга мөмкинлек бирәчәк

Фото: Денис Гордийко

(Казан шәһәре KZN.RU, 28 нче сентябрь). Казанда Авиатөзелеш районының зур юл участогында ремонт тәмамланды. Шуңа бәйле рәвештә шәһәр халкына транспорт хезмәте күрсәтүне яхшырту һәм Вересаев, Ударная, Пржевальский һәм Камчатка урамнарында үткәрү сәләтен арттыру өчен юл хәрәкәтен оештыру схемасы үзгәрәчәк, дип хәбәр иттеләр Авиатөзелеш һәм Яңа Савин районнары администрациясендә.

Яңа схема буенча Вересаев, Ударная, Пржевальский һәм Камчатка урамнарында бер яклы хәрәкәт оештырылачак.

Җәмәгать транспорты өчен өч яңа тукталыш пункты кертелә: «Пржевальский урамы» (Пржевальский урамындагы 4 нче йорт янында), «Циолковский урамы» (Пржевальский урамындагы 11 нче йорт янында), «Камчатка-2 урамы» (Камчатка урамындагы 31 нче йорт янында).

Түбәндәге маршрутлардагы автобуслар хәрәкәте схемасы үзгәрәчәк: 37, 40, 42, 78, 92 с, 93 нче.

Югарыда санап үтелгән урамнар участокларында юл хәрәкәтен оештыру схемасын үзгәртү Авиатөзелеш районының төньяк өлешендәге юлларда тыгынлык ситуацияләре санын киметергә мөмкинлек бирәчәк. Үткәрү сәләте сәгатенә 3 мең 680 машинадан 4 мең 639 машинага кадәр артачак дип көтелә.

Вересаев, Ударная, Пржевальский, Камчатка, Айдаров һәм Ленинград урамнарында юл өслегенә ремонт быел «Имин сыйфатлы юллар» илкүләм проекты буенча үткәрелде.

Моннан тыш, Камчатка урамының Коры елга бистәсен һәм Коры елга аша күперне тоташтыручы участогы Республика урам-юл челтәрен ремонтлау программасы буенча яңартылган.

Эшләр 3,25 км озынлыктагы участокны үз эченә ала. 28,7 мең кв.м мәйданда югары ныклы вак таш-мастик ЩМА-16 асфальт-бетоннан өске катлам салынган. Барлыгы 374 юл билгесе, 150 м озынлыкта җәяүлеләр коймалары урнаштырылган, 5 меңнән артык м озынлыгындагы юл һәм тротуар борт ташын алыштырганнар. Шулай ук светофор ярдәмендә көйләнә торган җәяүлеләр кичүе, яңа яктырту элементлары һәм тамгалар барлыкка килгән.

Шулай ук укыгыз

Барлык яңалыклар