Казанда биш яшүсмерләр клубында төзекләндерү эшләре тәмамланды

Быел Татарстан башкаласында барлыгы 8 клуб төзекләндереләчәк.

(Казан шәһәре KZN.RU, 30-нчы июль, Ксения Швецова). Казанда биш яшүсмерләр клубында төзекләндерү эшләре тәмамланды диярлек. Бу хакта бүген эшлекле дүшәмбедә ТКХ комитеты рәисе Дмитрий Анисимов хәбәр итте.

Капиталь төзекләндерү программасына барлыгы 8 яшүсмерләр клубы кертелгән. Бүген аларда 1500-дән артык бала һәм яшүсмер шөгыльләнә. Төзекләндерү эшләреннән соң алар сыешлылыгы 15 процентка артачак. Моннан кала, Дәрвишләр бистәсендә бүлеп бирелгән бинада яңа “Лазер” клубы ачылачак. Бу ел нәтиҗәләре буенча Казанда 44% (57-нең 25-се) яшүсмерләр клубы төзекләндереләчәк, диде Д.Анисимов.

Социаль өлкә объектларын яңарту буенча әлеге масштаблы эшләр – Татарстанның уникаль тәҗрибәсе, диде Мэр. “Яшүсмерләр клублары, сәламәтләндерү лагерьлары, мәктәпләр, балалар бакчалары – болар барысы да безнең республика масштабларында эшләнә, башка төбәкләрдә болар юк. Президентыбыз Рөстәм Миңнехановка рәхмәт, бу барлык муниципалитетларга да бәяләп бетергесез ярдәм булып тора”, - диде И.Метшин.

Д.Анисимов шулай ук сөйләгәнчә, “Уңайлы мохит” программасына быелга Казанның 9 объекты керде: 3 яшүсмерләр клубы, 4 сырхауханә һәм 2 балалар бакчасы. Бүген аларның һәрберсендә эшләр башкарыла.