2021 елның «Безнең ишегалды» республика программасы Казанда 23%ка үтәлгән

Шәһәр халкы ишегалды территорияләрен төзекләндерү буенча 1700-дән артык тәкъдим һәм искәрмә җибәргән.

Фото: Денис Гордийко

(Казан шәһәре KZN.RU, 7-нче июнь, Ксения Швецова). Казанда «Безнең ишегалды» республика программасы бүген 23%-ка үтәлде. 19 йортның ишегалларында юл эшләре тәмамланган, хәзерге вакытта 131 йорт территориясендә төзекләндерү эшләре бара. Шәһәрлеләрнең башкарылган эшләр белән канәгатьлеге 85% тәшкил итә – бу программаның максатчан күрсәткеченнән югарырак. Бүген эшлекле дүшәмбедә Казан Мэры Илсур Метшин теге яки бу эшләр кирәклеге турында казанлыларның фикерен актив рәвештә контрольдә тотарга чакырды.

Бер генә күрше төбәктә дә аналоглары булмаган «Безнең ишегалды» программасы шәһәргә дистә еллар дәвамында хәл ителмәгән проблемаларны хәл итәргә мөмкинлек бирде, дип ассызыклады Мэр. «Безнең өчен бу зур шатлык – план буенча эшләү, график буенча, акчаның килеп җитүен белеп, подрядчылар үз вакытында эшкә керешәчәкләр, һәм без куелган максатларны тормышка ашыра алачакбыз. Мондый мөмкинлек кыйммәт тора», – диде И.Метшин.

Быел Казанда «Безнең ишегалды» программасын гамәлгә ашыруга 2,3 млрд сум бүлеп бирелгән, дип искәртте Башкарма комитет җитәкчесе урынбасары Игорь Куляжев. Программа 408 йортның ишегалды территорияләрен төзекләндерү, ремонтлана торган мәйданы 500 мең квадрат метрдан артык тәшкил итәчәк. Эшләр комплексына асфальт-бетон өслеген ремонтлау, тышкы яктырту челтәрләрен урнаштыру, балалар һәм спорт җиһазлары, эскәмияләр һәм чүп савытлары урнаштыру кертелгән.

Бүгенге көнгә 19 йортта, аерым алганда, Беломор урамы, 236, 238, 240, 242, 244, Декабристлар урамы, 107, 109, Седов урамы, 3, Гвардейская урамы, 59, 61, 63, 65 адреслары буенча юл эшләре төгәлләнде. Бу ишегалларында юлларның киңлеге, яңа тротуарлар, кече архитектура формалары өчен мәйданчыклар төзекләндерелде, дип билгеләп үтте И.Куляжев.

Кече архитектура формаларын вакытында китерү өчен заказ бирүчегә халык белән килештерелгән тиешле спецификацияләр җибәрелде, ә тәэмин итүчеләр белән аларны китерү буенча килешүләр төзелде, дип өстәде Башкарма комитет җитәкчесе урынбасары.

Барлык эшләр график нигезендә алып барыла, ә аларның сыйфаты катгый контрольдә, дип ассызыклады спикер. Шулай итеп, «Главтатдортранс» дәүләт казна учреждениесе, «Татарстан Республикасы Главинвестстрой» дәүләт казна учреждениесе, төзекләндерү объектларын техник күзәтү хезмәте нормаларга һәм кагыйдәләргә туры килүен тикшерәләр.

Программаны гамәлгә ашыруга кешеләр үзләре аерым өлеш кертә, дип ассызыклады И.Куляжев. Ул искәрткәнчә, эшләр башланыр алдыннан һәр ишегалдында объектларның паспортлары килештерелгән төзекләндерү планы белән урнаштырыла. Халык үз фикерен һәм тәкъдимен әйтә яки эш барышында ук фикерләре белән уртаклаша ала. Моны шулай ук социаль челтәрләрдә, dvor.tatar программасының рәсми порталында яисә +7(800)275-20-20 кайнар линия телефоны аша эшләргә була.

«Мөрәҗәгатьләр нәтиҗәләре буенча көн саен тиешле карарлар кабул ителә, – диде И.Куляжев. – Быел 1720 мөрәҗәгать килде, һәркайсына җавап бирелде».

Эшләрне физик яктан үтәүдән тыш, программаны гамәлгә ашыру нәтиҗәлелегенең төп күрсәткечләренең берсе – халыкның канәгатьлелеге. Индикатор уңай һәм тискәре бәяләмәләр санын үлчи. Бүгенге көнгә Казан буенча әлеге күрсәткеч 85% тәшкил итә, бу программаның максатчан күрсәткеченнән артып китә (80%).