В целях анализа посещаемости и улучшения работы портала мы используем сервис «Яндекс.Метрика». Оставаясь на нашем портале, Вы выражаете свое согласие на обработку Ваших данных указанным сервисом.
Яңалыклар
28.11.2019, 17:23
Идел буе шәһәрләренең торак-коммуналь хуҗалык өлкәсе вәкилләре Казанның суларны чыгару системасын модернизацияләү тәҗрибәсен өйрәнделәр
Гамәли семинарда катнашучылар «Заречная» канализация насос станциясен төзү һәм ләм басуларын рекультивацияләү проектлары белән таныштылар.
(Казан шәһәре KZN.RU, 28-нче ноябрь, Алсу Сафина). Бүген Казан Башкарма комитетында Идел буе шәһәрләре ассоциациясенең гамәли семинарында су чыгару системасын һәм су каналларының чистарту корылмаларын модернизацияләү проблемалары турында фикер алыштылар. Казан Башкарма комитетында узган чарада Торак-коммуналь хуҗалык өлкәсе вәкилләре катнашты. Семинарга кадәр кунаклар «Водоканал» муниципаль унитар предприятисенең биологик чистарту корылмаларында, шул исәптән ләм ятмаларын термоэшкәртү заводы төзелә торган мәйданчыкта һәм «Заречная» канализация насос станциясе төзелеш мәйданчыгында булдылар.
Семинарда катнашучыларны Башкарма комитет җитәкчесе урынбасары Искәндәр Гыйниятуллин сәламләде. «Ышанам ки, бу файдалы чара, чөнки барлык шәһәрләр дә су каналларын, чистарту корылмаларын эксплуатацияләү буенча охшаш проблемаларга ия. Сез Казанның «Водоканал» муниципаль унитар предприятисе үткәрә торган эшне күрдегез. Чистарту корылмалары барысында да диярлек бер үк принцип буенча төзелде, әмма бүген вәзгыять үзгәрде: моннан унъеллыклар элек булганы белән чагыштырып караганда,а гынты суларның составы үзгәрде, бүген җиһазларны эксплуатацияләүнең яңа принциплары һәм ремонт технологияләре кулланыла. Биредә, бу мәсьәләләр буенча фикер алышканда, без уртаклыклар табарга һәм тәҗрибә алмашырга телибез», – диде ул.
«Водоканал» муниципаль унитар предприятисенең 2028 елга кадәр озак сроклы инвестпрограммасы кысаларында тормышка ашырыла торган өч зур проекты турында предприятие генераль директорының беренче урынбасары Марат Сәләхов сөйләде. Шуларның беренчесе - сәгатенә 20 мең кубометр проект егәрлеге булган яңа «Заречная» канализация станциясен төзү. Хәзерге вакытта трансформатор подстанциясе, мәйдан эчендәге һәм мәйданнан тыш инженерлык коммуникацияләре булган канализация насос станциясе төзелешенең беренче этабы тәмамлана, шул исәптән, күчерү камерасын төзү белән басымлы коллекторлар, кайтаргыч мөстәкыйль ага торган коллекторлар төзү дә керә. Исегезгә төшерәбез, объектны киләсе елда файдалануга тапшыру планлаштырыла. Калган этапларда 10 чакрымнан артык озынлыктагы ике яңа басым коллекторын төзү һәм булган коллекторны реконструкцияләү күздә тотыла.
Икенче зур проект - начар технологик ис чыганагы булган чистарту корылмалары конструкцияләрен ябу. М.Сәлахов сөйләвенчә, заманча технологияләр проблеманы хәл итәргә мөмкинлек бирде – аерым корылмалар, агынты суларны чистарту технологияләрен бозмыйча, технологик исне нейтральләштерә торган махсус конструкцияләр белән капланды. «Эшләр 2017 елның мартында башланды. Бүгенге көндә проект тормышка ашырылды. Гомуми мәйданы 20 мең кв.м булган 25 корылма, аны 3 футбол кыры белән чагыштырырырга мөмкин, махсус конструкцияләр белән капланды», - дип билгеләп үтте «Водоканал» муниципаль унитар предприятиесе генераль директорының беренче урынбасары.
Өченче масштаблы проект - барлыкка килгән юшкынны термомеханик эшкәртү цехының чистарту корылмаларында төзелеш. Ләм басуларына яңа барлыкка килгән юшкыннарны чыгаруны туктату өчен кирәкле цех төзелеше башланды инде. «Технология белән дымлылыгы 75%-ка җитә торган юшкынны әйләнә торган барабанда кайнар һава белән киптерү каралган. Киптерү барышында дымлылыгы 10% булган гранулалар барлыкка килә», - дип сөйләде Марат Сәләхов һәм проектны финанслау предприятиенең үз акчалары хисабына башкарыла, дип өстәде.
Хәзерге вакытта суүткәргеч, техник су торбаүткәргечләре, җылылык трассасы, яңгыр канализациясе, җитештерү канализациясе, газүткәргечләр сузылган. Җитештерү-көнкүреш корпусының җир асты өлешен, хуҗалык-көнкүреш агымнары резервуарын һәм фугат резервуарын төзү буенча эшләр алып барыла. Кирәкле җиһазлар кайтартылган.
«Водоканал» генераль директорының беренче урынбасары шулай ук Идел буе районы территориясендәге Отар һәм Иске Победилово бистәләре арасында - Куйбышев сусаклагычына якын урнашкан, гомуми мәйданы 100 гектардан артык булган ләм кырларын рекультивацияләү планнары турында сөйләде. «Хәзерге вакытта рекультивация проектын финанслау буенча тәкъдимнәр Россия Федерациясе һәм Татарстан Республикасы максатчан программаларына кертү мөмкинлеге өчен карала», - дип хәбәр итте ул.
Марат Сәлахов Россиядә ләм мәйданчыкларын рекультивацияләүнең уңышлы гамәлгә ашырылган проектлары юк, дип билгеләп үтте. Дистәдән артык рекультивация технологияләре каралды, моннан тыш, ТР Экология һәм табигый байлыклар министрлыгы эксперт-белгечләрен һәм республика Фәннәр академиясе галимнәрен җәлеп итү турында карар кабул ителде.
Ләм басуларын рекультивацияләү технологияләренең берсе - агынты сулар утырмасын сүндерелмәгән известь һәм актив цеолит кулланып эшкәртү методы, ул Казанда уңышлы апробация үтте. Семинарда бу ысулны апробацияләү нәтиҗәләре турында ТР Фәннәр Академиясенең Экология һәм җир асты байлыкларыннан файдалану проблемалары институты директоры Рифгать Шаһидуллин сөйләде. Төп бурычлар явым-төшемнәрне утильләштерү генә түгел, аларны зарарсызландыру да, авыр металларның химик пычрану дәрәҗәсен киметү дә иде. Шул ук вакытта мөһим аспект – җыелган явым-төшемнәрне аларның урнашу урынында эшкәртү. Сынау 64 кв. м мәйданлы участокта үткәрелде.
Казанда үткәрелгән методны апробацияләү семинарда катнашучыларда кызыксыну уятты.
Торак-коммуналь хуҗалык комитеты рәисе урынбасары Сергей Сотов билгеләп үткәнчә, суларны чыгару объектларын төзү һәм реконструкцияләү Казанның Генераль планы проектында каралган.
Шуны да билгеләп үтәргә кирәк, шәһәр хуҗалыгының төрле өлкәләре вәкилләре өчен мондый семинарлар Казанда Идел буе шәһәрләре ассоциациясе тарафыннан беренче тапкыр гына үткәрелми. Әйтик, җәй көне Идел буе шәһәрләре ассоциациясе катнашучылары калдыкларны аерым төрләргә бүлеп җыю буенча Казан тәҗрибәсен өйрәнделәр.
Фоторепортаж
Идел буе шәһәрләре ассоциациясенең гамәли семинарлары, 28.11.2019
Шулай ук укыгыз
-
24.07.2025, 12:32 -
23.07.2025, 15:02 -
22.07.2025, 13:38 -
21.07.2025, 15:37