И.Метшин: «Быел төзелеш материалларына бәяләр күтәрелеп кенә калмады, ә бик нык артты»

Капиталь ремонт программасында катнашучы подрядчыларга бәяләре арткан материалларга киткән чыгымнарны компенсацияләячәкләр.

Фото: Марат Мугинов

(Казан шәһәре KZN.RU, 13-нче декабрь, Ксения Швецова). Быел торак фондына капиталь ремонт үткәрүне төзелеш материаллары бәясенең кискен артуы катлауландырды. Подрядчылар атна саен бәяләр арту белән очрашты, нәтиҗәдә, алар конкурс документларында уйнатылган бәядән 2-3 тапкыр артыграк булды. Бу проблеманы хәл итү өчен сентябрь аенда РФ Хөкүмәте карары кабул ителде, ул подрядчыларга кыйммәтләнгән материалларга чыгымнарны компенсацияләргә мөмкинлек бирде. «Узган яз, төзелеш базарында бәяләр күтәрелү сәбәпле, бик эссе булды. Федераль хөкүмәткә безне ишеткәннәре һәм подрядчылар белән килешүләр төзергә рөхсәт итүләре өчен рәхмәт», – диде бүген Казан Мэры Башкарма комитетының аппарат киңәшмәсендә Илсур Метшин.

Төзелеш материалларына бәяләр артудан тыш, подрядчылар аларның базарда булмавы белән очрашты, бу объектларны тапшыру срокларын озайтты, дип хәбәр итте Торак-коммуналь хуҗалык комитеты рәисе Дмитрий Анисимов. «Кайбер төп материалларны республика чикләреннән алып кайтырга туры килде. Шуның аркасында материаллар кайтару сроклары шактый артты. Нәтиҗә буларак, эшләрне башкару сроклары күчте», – дип аңлатты ул.

Элек закон буенча материалларга бәяләр арту сәбәпле контракт бәясен арттыру каралмаган иде. Илнең башка төбәкләре дә шундый ук проблема белән очрашты.

Сентябрь ахырында ТР Төзелеш, архитектура һәм торак-коммуналь хуҗалык Министрлыгыннан һәм башка төбәкләрдән килгән мөрәҗәгатьләрдән соң, Россия Хөкүмәте карар кабул итте, аның нигезендә, материалларга бәяләр арту сәбәпле, килешү бәясен арттыру мөмкин булды, әмма беренчел бәядән 25%-тан да артмаска тиеш. Бу карар подрядчы оешмаларга материалларга бәяләр арту белән бәйле чыгымнарны компенсацияләргә мөмкинлек бирде.

Казанда карар чыкканнан соң, смета документациясен, материалларның факттагы бәяләрен исәпкә алып, яңадан исәпләү буенча эш башланды. Документларны, эшнең бәясе аермасын билгеләү өчен, кабат экспертизага җибәрделәр.

«Бу эш нәтиҗәләре буенча Татарстан Президенты адресына өстәмә акча бүлеп бирү турындагы үтенеч белән мөрәҗәгать юлланды. Без аның уңай хәл ителүенә бик өметләнәбез, – дип өстәде Д.Анисимов.

«Быел чыннан да торакка капиталь ремонт ясау өлкәсендә зур эш башкарылды. Тик һәр ел саен ниндидер сюрпризлар килеп чыга: башта узган елгы планнарыбызга пандемия төзәтмәләр кертте, ә быел төзелеш материалларына бәяләр күтәрелеп кенә калмады, ә каядыр космоска очты. – дип шәрехләде И.Метшин. – Без бу мәсьәләне хәл иткән өчен рәхмәтле».

Исегезгә төшерәбез, Казанда быел капиталь ремонт программасы кысаларында күп фатирлы 293 йорт ремонтланды.