И.Метшин: «Хәзер «Савиново» спорт мәктәбенең зур нәтиҗәләргә ирешү өчен барлык шартлары да бар»

Казан Мэры капиталь ремонт ясалган административ блокта булды һәм яшь спортчыларны яңа бина белән котлады.

Фото: Денис Гордийко

(Казан шәһәре KZN.RU, 12 нче август, Юлия Летникова). Казанның Яңа Савин районында «Савиново» спорт мәктәбенең административ-хуҗалык блогында капиталь ремонт тәмамланды. Хәзер яшь футболчыларның тренировкалар өчен кыры гына түгел, барлык кирәкле җиһазлар белән үз базасы да бар. Казан Мэры Илсур Метшин спорт мәктәбе территориясендә булып кайтты һәм анда тәрбияләнүчеләрне яңа бина белән котлады.

«Савиново» спорт мәктәбе 2000 елда төзелгән, әмма футболчыларның үз базасы юк иде, шуңа күрә узган ел бу максатлар өчен 113 нче номерлы мәктәп бинасын совет чорында тир урнашкан бинага тапшырырга карар кылынды. «Без бирегә бина тузган һәм куллану өчен бөтенләй яраксыз булган вакытта килдек. Хәзер җиһазландырылган бүлмәләрдә киенү-чишенү бүлмәләре һәм тренер бүлмәләре ясалды – яшь спортчылар зур нәтиҗәләргә ирешсен өчен барлык шартлар да тудырылган», – диде шәһәр башлыгы.

«Савиново» спорт мәктәбе директоры Алексей Шуваров яңартылган административ-хуҗалык блогы буенча экскурсия үткәрде. Ремонт барышында биредә ишекләр урнаштырылган, сантехника алмаштырылган, плитка җәелгән, бинаның фасадын ремонтлаганнар һәм җылытканнар, бүлмәләргә косметик ремонт ясаганнар, шулай ук сәламәтлек мөмкинлеге чикләнгән кешеләр өчен керү урыны уңайлы итеп эшләнгән. Бүгенге көндә спорт мәктәбендә 500 гә якын яшь футболчы шөгыльләнә, шуларның 42 сенең ишетү сәләте бозылган.

Ремонттан соң 383 кв. м мәйданлы бинада 4 киенү-чишенү бүлмәсе, тренерлар бүлмәсе, сәламәтлек мөмкинлекләре чикләнгән балалар өчен уңайлы санузеллар, ресепшен зонасы, спорт инвентаре саклау бүлмәсе, директор һәм судьялар кабинеты барлыкка килде. Казан Мэры капиталь ремонт нәтиҗәләрен югары бәяләде. «Киенү-чишенү бүлмәләре профессиональ футбол командаларының киенү-чишенү бүлмәләреннән берни белән дә калышмый», – дип билгеләде шәһәр башлыгы.

Экскурсиядән соң Илсур Метшин спорт мәктәбендә тәрбияләнүчеләр белән аралашты, команда капитаннарына яңа туплар белән сетка, ә директорга спорт инвентаре сатып алу өчен 100 мең сумлык сертификат тапшырды. «Яхшы нәтиҗәләргә ирешү өчен күнегүләрне һәм осталыкларыгызны камилләштерүне дәвам итегез», – дип мөрәҗәгать итте шәһәр башлыгы яшь спортчыларга.

2018 елда яшь футболчылар өчен 94x63 метрлы футбол кыры төзекләндерелде. Алар белән бергә биредә «Динамо» балалар-яшүсмерләр спорт мәктәбе хоккейчылары шөгыльләнде, хәзер аларның дәресләре резин өслекле өч йөгерү юлында уза. Моннан тыш, кыр янында җиңел атлетларның тренировкалары өчен сикерү үзәнлеге барлыкка килде.

Бүгенге көндә Татарстан башкаласында спорт мәктәпләрендә 3 меңгә якын бала һәм яшүсмер футбол белән шөгыльләнә. Тагын 19 мең казанлы даими рәвештә футбол уйный. Шәһәрдә барлыгы 165 футбол кыры һәм 7 ябык футбол манежы бар.

Исегезгә төшерәбез, хәзерге вакытта Казанда «Мотор» спорт мәктәбен, «Яшь гвардия» спорт-сәламәтләндерү лагерен капиталь ремонтлау, шулай ук 49 нчы номерлы мәктәп территориясендә ачык типтагы 4 нче физкультура-сәламәтләндерү комплексын төзү дәвам итә. Ел ахырына кадәр «Весна» торак комплексында баскетбол үзәге, Салават Күперендә гимнастика үзәге, шулай ук «Казан» ат спорты комплексы өчен манеж төзелеше буенча проект эшләре тәмамланачак.

Казан Мэры белән бергә объектны ТР спорт министры урынбасары Алмаз Мингулов, Авиатөзелеш һәм Яңа Савин районнары администрациясе башлыгы Фәнис Нурмөхәммәтов, Казан Башкарма комитетының Физик культура һәм спорт комитеты рәисе Альберт Салихов һәм башкалар карады.