«Игелекле Казан» 42 өлкән яшьтәге кешегә һәм инвалидка кар чистартырга ярдәм итте

Халык гаризаларын кайнар линия буенча кабул итүне дәвам итәләр

Фото: Казан шәһәре KZN.RU

(Казан шәһәре KZN.RU, 22 нче гыйнвар, Диләрә Гафурова). Узган ял көннәрендә, кар яуган чорда, «Игелекле Казан» кайнар линиясенә шәһәрлеләрдән кар җыюда ярдәм итүләрен сорап 135 мөрәҗәгать килде. 42 өлкән яшьтәге кешегә, шул исәптән ялгызларга, шәхси секторда һәм поселокларда яшәүче инвалид гаиләләргә ярдәм күрсәтелде. Калган гаризалар район администрацияләренә тапшырылды. Бу хакта кар җыю буенча оператив штаб утырышында шәһәр Башкарма комитеты җитәкчесе урынбасары Гүзәл Сәгыйтова хәбәр итте.

«Шимбә көнне, 20 нче гыйнварда, 24 мөрәҗәгать килде, шуларның 6 сы – өлкәннәрдән һәм инвалидлардан. Калганнары – поселокларда юлларны чистартуны сорап язылган коллектив мөрәҗәгатьләр. Якшәмбе, 21 нче гыйнварда, тагын 111 мөрәҗәгать килде, шуларның 36 сы – ялгыз яшәүчеләрдән, өлкәннәрдән һәм инвалид гаиләләрдән», – дип хәбәр итте Башкарма комитет җитәкчесе урынбасары.

Өлкәннәргә һәм инвалидларга кар чистартуда аларның күршеләре актив ярдәм иткән.

«Безнең волонтерлар өлкән яшьтәге кешеләргә гариза буенча килгән очраклар булды, ә күршеләр аларга актив ярдәм күрсәтә иде. Эш ике тапкыр тизрәк башкарылды. Битараф булмаган казанлыларга зур рәхмәт», – дип мөрәҗәгать итте халыкка Башкарма комитет җитәкчесе урынбасары.

Башлыча кайнар линиягә тыкрыкларны кардан чистартуга коллектив гаризалар килә. Барлык мәгълүматны шәһәр районнары администрацияләренә тапшыралар, аларда да кайнар линияләр булдырылган. Гаризалар республика районнарында яшәүче якыннары булган шәһәр кешеләреннән дә килә.

«Игелекле Казан» кайнар линиясенә өлкән яшьтәге ата-аналары Татарстан Республикасы районнарында яшәүче казанлылардан гаризалар килгән. Буа, Яшел Үзән, Лаеш районнарындагы коллегаларыбыз белән шәхсән элемтәгә чыктым. Бу гаризалар эшләнде. Кайберләре бүген эшләнәчәк», - дип ассызыклады Гүзәл Сәгыйтова.

Өлкән яшьтәге гражданнардан һәм инвалид гаиләләрдән кар җыю буенча гаризаларны «Игелекле Казан» кайнар линиясе телефоны буенча кабул итүне дәвам итәләр: +7(843)558-74-18.