2023 елда төзекләндереләчәк объектлар өчен 120 меңнән артык татарстанлы тавыш биргән

Ишегалларын һәм җәмәгать киңлекләрен билгеләү өчен сораштыру 30 нчы майга кадәр дәвам итәчәк.

Фото: Денис Гордийко

(Казан шәһәре KZN.RU, 29 нчы апрель). Татарстанның 120 меңнән артык кешесе Татарстанның 2023 елда төзекләндереләчәк иҗтимагый киңлекләре өчен сораштыруда катнашкан инде. Өстенлекле объектларны билгеләү өчен тавыш бирү 30 нчы майга кадәр дәвам итәчәк, дип хәбәр ителә ТР Төзелеш, архитектура һәм торак-коммуналь хуҗалык министрлыгы сайтында.

Республика халкының «Безнең ишегалды» президент программасы буенча өстенлекле тәртиптә төзекләндереләчәк 200 ишегалдын сайлап алу мөмкинлеге бар. Ишегалларын төзекләндерү эшен 2023 елның көзенә төгәлләргә планлаштыралар.

Моннан тыш, татарстанлылар киләсе елда төзекләндерергә кирәк булган парклар, скверлар һәм яр буйлары өчен тавыш бирә ала. Сораштыруда барлыгы 204 иҗтимагый киңлек катнаша, шул исәптән Казанның 27 объекты, моннан тыш, үз вариантыңны да тәкъдим итәргә мөмкин. Тавыш бирү «Торак һәм шәһәр мохите» илкүләм проектының «Уңайлы шәһәр тирәлеген формалаштыру» федераль проекты кысаларында үткәрелә.

Барлык теләүчеләр дә сылтама буенча сораштыруда катнаша алалар.

Парклар, скверлар һәм ишегаллары өчен сораштыру 15 нче апрельдә башланды. Быелгы тавыш бирүдә 14 яшьтән башлап катнашырга мөмкин.

Исегезгә төшерәбез, «Безнең ишегалды» программасын гамәлгә ашыру өчен Казанда өстәмә рәвештә 500 млн сум акча бүлеп биреләчәк. 2021 елда Казанда 430 йортның 227 ишегалды территориясе төзекләндерелгән. Уңай якка үзгәрешләр 100 меңгә якын кешене колачлаган.

Шулай ук укыгыз

Барлык яңалыклар