Казан Кремленең Спас манарасындагы йолдызы реставрацияләнәчәк

Белгечләр берничә дистә ел хезмәт итәчәк йолдыз нурларын тутыкмый торган корычтан искесе үрнәгендә ясаячак.

Фото: Татарстан Республикасының мәдәни мирас объектларын саклау буенча комитеты

(Казан шәһәре KZN.RU, 22 нче июнь). Реставрация өчен Казан Кремленең Спас манарасыннан йолдызны алганнар. Хәзер ул производство базасында үзенең яңартылуын көтә.

Йолдыз Спас манарасына 1963 елда урнаштырылган. 60 ел эчендә җиздән ясалган йолдыз нурлары тузган, тутыккан һәм алыштыруны таләп итә. Белгечләр иске йолдыз үрнәгендә тутыкмый торган корычтан шундый ук йолдыз нурларын әзерләячәк, алар берничә дистә ел хезмәт итәчәк. Металлны коррозиягә каршы материаллар һәм титан нитриды белән каплаячаклар – шуның аркасында йолдыз алтын кебек ялтыраячак. Нурларны, элеккегечә үк, булган каркаска беркетәчәкләр, ул яхшы хәлдә сакланган. Йолдыз очка беркетелә торган торбаны – конструкциянең нигезен ныгытачаклар, ә декоратив алюминий кыңгырауны яңадан коячаклар, бу юлы корычтан, дип хәбәр иттеләр ТР Мәдәни мирас объектларын саклау буенча дәүләт комитетында.

Йолдызны реставрацияләү детальләре турында экспертлар, тимерчелек эше осталары, подрядчылар һәм Спас манарасының реставрация эшләренә заказ бирүче вәкилләр бергәләп фикер алышалар.

Исегезгә төшерәбез, язын Спас манарасын реставрацияләү башланды. Эшләр тәмамланганнан соң XVI гасыр архитектура һәйкәле яңа тормыш белән яши башлар һәм беренче тапкыр туристлар һәм шәһәр халкы өчен ачык булыр дип көтелә.

Шулай ук укыгыз

Барлык яңалыклар