Казанда яшәүче бер ханым мошенникларның «куркынычсыз счетларына» 1,3 миллион сумга якын акча күчергән

«Аеруча зур күләмдәге мошенниклык» маддәсе буенча җинаять эше кузгатылган.

Фото: Марат Мөгыйнов

(Казан шәһәре KZN.RU, 13 нче июль). Казанда 45 яшьлек хатын-кыз мошенниклар корбаны булган. Җинаятьчеләргә ышанып, ул «куркынычсыз счет»ка 1,3 миллион сумга якын акча күчергән.

22 нче июньдә зыян күрүченең телефонына үзен банк хезмәткәре дип таныштырган таныш булмаган кеше шалтырата. Аферист зыян күрүчегә җинаятьчеләрнең аның исеменә кредит рәсмиләштерергә җыенулары турында сөйли. Шулай ук башка банк счетларындагы акчаларны да мошенниклар урларга мөмкин, дип җиткерә.

Аннары аралашу мессенджерларның берсендә дәвам иткән. Хатын-кыз белән таныш булмаган кыз элемтәгә керә, ул үзен башка банк хезмәткәре дип таныштыра. Җинаятьче клиентның шәхси кабинетын мошенниклар ачканлыгын җиткерә. Акчаны саклап калу өчен, хатын-кызга кредит рәсмиләштерергә, аны счеттан алырга һәм икенче «куркынычсыз счет»ка күчерергә кирәк, ди. Барлык күрсәтмәләрне үтәп, хатын-кыз 1 млн 291 мең сумнан артык акча күчергән.

Хәзерге вакытта «Зареченский» полиция бүлегендә РФ Җинаять кодексының 159 нчы маддәсенең 4 нче өлешендә каралган «Аеруча зур күләмдәгы мошенниклык» дип аталган җинаять составы билгеләре буенча җинаять эше кузгатылган, дип хәбәр иттеләр Россия Эчке эшләр министрлыгының Казан буенча идарәсе матбугат хезмәтендә.

Мошенниклык очраклары ешаюга бәйле рәвештә, Россия Эчке эшләр министрлыгы халыкны игътибарлы булырга чакыра. Телефонга шалтыратучы һәм туганнарыгыз турында мәгълүмат җиткерүче билгесез затларга ышанырга кирәкми.

Шулай ук банк картасыннан акча урлау очракларын булдырмас өчен, счетның торышы турында хәбәр итә алган бердәнбер оешма – аңа хезмәт күрсәтүче банк булуын истә тотарга кирәк.

Әгәр карта белән нинди дә булса операцияләр үткәрелү, аны блокировкалау турында СМС-хәбәр килсә, кичекмәстән банкка мөрәҗәгать итәргә кирәк. Банкның клиент хезмәте телефоны гадәттә картаның икенче ягында күрсәтелә. СМС-хәбәрдә күрсәтелгән номерларга шалтыратып, хәбәр юлларга кирәкми, моның өчен өстәмә түләү алынырга мөмкин.

Шулай ук укыгыз

Барлык яңалыклар