Казанда яшәүче хатын мошенникка 1 млн сумнан артык акча күчергән

Җинаятьче зыян күрүчене аның исеменә кредит рәсмиләштерелгән һәм аны ябарга кирәк дип ышандырган.

Фото: Денис Гордийко

(Казан шәһәре KZN.RU, 6 нчы февраль). Казанда яшәүче хатын мошенникларга ышана һәм аларга 1 млн 200 мең сум акча күчерә.

54 яшьлек хатынның сүзләренә караганда, аның телефонына билгесез кеше шалтыраткан һәм үзен банк хезмәткәре дип таныштырган. Ул зыян күрүче исеменә 1 млн сум күләмендә кредит рәсмиләштерелүен хәбәр итте. Аферист зыян күрүчене банкта 1,2 млн сумлык займ рәсмиләштерергә һәм «бурычны» ябарга ышандырган. Казанда яшәүче хатын мошенник күрсәтмәләрен үти һәм акчаны аның счетына күчерә.

Аферист ял көннәреннән соң шалтыратырга вәгъдә бирә, ләкин тиздән хатын алдау корбаны булуын аңлый һәм «Юдино» полиция бүлегенә гариза яза. РФ Җинаять кодексының 159 нчы маддәсенең 3 нче бүлегендә каралган «Мошенниклык» җинаять составы билгеләре буенча җинаять эше кузгатылды, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Россия Эчке эшләр министрлыгы халыкны игътибарлы булырга чакыра – банкларның ялган хезмәткәрләреннән шалтыратулар мошенниклыкның иң киң таралган төре булып кала бирә. Аферистларның хәйләләренә эләкмәс өчен, шикле шалтыратулар булганда телефонны куеп, банк картасының арткы ягында күрсәтелгән номер белән чагыштырырга кирәк.

Шикле операцияләр вакытында банк, хәбәр итмичә генә, картаны үзе блокировкалый алуын аңларга кирәк. Кызыксынган кеше буларак карта хуҗасы үзе банкка шалтыратырга һәм блокировкалауның сәбәбен белергә тиеш.

Шулай ук укыгыз

Барлык яңалыклар