Казанда яшәүче бер ханым каракларга 341 мең сум акча күчергән

Пенсионерга билгесез кеше шалтырата һәм үзен банк хезмәткәре буларак таныштыра.

(Казан шәһәре KZN.RU, 11-нче февраль). Казанда яшәүче 67 яшьлек ханым караклар корбаны булган һәм аларга 341 мең сум акча күчергән. Зыян күрүче бу хәл турында гариза белән 31-нче гыйнварда «Мәскәү» полиция бүлегенә мөрәҗәгать итә.

Ханым сөйләвенчә, 20-нче гыйнвар кичендә аңа билгесез кеше шалтырата, ул үзен банк хезмәткәре буларак таныштыра һәм берничә төгәлләштерә торган сорау бирә. Кыска гына сөйләшүдән соң, ир, янәсе, шалтыратуны банкларның берсенең баш офисы белгеченә күчергән. Хатын үзен Анастасия Викторовна буларак таныштырган һәм зыян күрүчегә хәзерге вакытта аның банк счетларыннан Мәскәү өлкәсе территориясендә яшәүче ир-ат исеменә акча күчерү гамәлгә ашырыла, дип аңлаткан. Шалтыратучы хатын счет хуҗабикәсеннән күчерүнең инициаторы булып тору-тормавын аныклый. Шул ук вакытта, зыян күрүченең сүзләренә караганда, таныш булмаган хатын аның турында шәхси һәм счетлары турындагы мәгълүматны белгән. Аңа чыннан да банктан шалтыратуларына ышанып, өлкән яшьтәге ханым барлык шартларны үтәргә риза була һәм билгесез электрон акча янчыгы счетына 341 мең сум акча күчерә. Бу, янәсе, санкцияләнмәгән күчерүләрне туктатып тору һәм акча чараларын саклау өчен кирәк булган. Банк операцияләрен гамәлгә ашыру вакытында билгесез хатын-кыз һәрчак элемтәдә булган. Ул зыян күрүчегә 22-нче гыйнварда банк бүлекләренең берсенә документлар алу өчен килергә киңәш итә, тик анда аңа каракларның корбаны булуын хәбәр итәләр.

«Урлау» РФ Җинаять кодексының 159 маддәсенең 3 өлеше буенча кузгатылган җинаять эшен тикшерү бара. Полиция хезмәткәрләре җинаять кылуга катнашы булган затларны ачыклый.

Искәртеп узабыз, җинаять корбаны булмас өчен таныш булмаган затлардан килгән барлык мәгълүматны яңадан тикшерергә, таныш булмаган кешеләргә үзләренең банк карталары һәм счетлары турында мәгълүмат җиткермәскә, билгесез счетларга акча күчермәскә кирәк. Шикле хәлләрдә шунда ук полициягә «02» яки «112» телефоннары аша шалтыратырга кирәк, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Шулай ук укыгыз

Барлык яңалыклар