Казанда яшәүчеләр РФ Дәүләт хезмәтләре порталында донорлар өчен хезмәтләрдән файдалана ала

Кулланучылар өчен башкарылган донацияләр тарихы, кан анализлары нәтиҗәләре, шулай ук түләүле ялларны рәсмиләштерү өчен белешмә ачык.

Фото: Казан шәһәре KZN.RU

(Казан шәһәре KZN.RU, 26 нчы октябрь). РФ Дәүләт хезмәтләре порталының «Сәламәтлек» бүлегендә кан һәм сөяк мие донорлыгы турында мәгълүмат бар. Биредә кулланучылар башкарылган донацияләр тарихын күрә, аларның һәркайсы буенча кан анализы нәтиҗәләре белән таныша һәм түләүле ялны рәсмиләштерү өчен белешмә йөкләтеп ала ала.

Якын арада сервис тагын бер функция белән тулыландырылачак, аның ярдәмендә кан тапшыруга дистанцион рәвештә язылу мөмкинлеге барлыкка киләчәк. Шулай ук сөяк миенең потенциаль доноры булырга теләүчеләр өчен дәүләт хезмәтләре порталында федераль регистрга гариза бирү өчен махсус форма барлыкка килде, дип хәбәр итә Россия цифрлар министрлыгы матбугат хезмәте.

Ведомствода искә төшерүләренчә, сөяк миен күчерү җитди кан авырулары булган кешеләр өчен бердәнбер савыгу мөмкинлеге булырга мөмкин. Регистрга язылу өчен картада уңайлы рекрутинг үзәген күрсәтергә һәм гариза бирергә кирәк. Аннары оешма хезмәткәрләре визит вакытын билгели. Дәүләт хезмәтләре порталында каршылыклар булмаган очракта сөяк мие донорлары регистрына кертү турында тиешле хәбәр барлыкка киләчәк.

Шулай ук укыгыз

Барлык яңалыклар