Торак-коммуналь хезмәтләр өчен арттырылган түләүләр: Казан халкына кая мөрәҗәгать итәргә

KZN.RU порталы счет-фактураларда исәп-хисапларның дөреслеген кайда ачыкларга булуы турында белешмәлек әзерләде.

Фото: Марат Мөгыйнов

(Казан шәһәре KZN.RU, 12 нче гыйнвар). Гыйнварда казанлылар торак-коммуналь хезмәтләр өчен түләүгә уртача 9% ка индексацияләнгән тарифлар белән квитанцияләр алдылар. Алар ел ярымнан артык гамәлдә булачак: киләсе индексация 2024 елның июлендә көтелә. KZN.RU порталы шәһәр халкына счет-фактуралар буенча сораулар яки шелтәләр булса, кая мөрәҗәгать итәргә кирәклеге турында белешмәлек әзерләде.

Идарәче компанияләр исәпләүләрне тарифлар артуга нигезләнеп яңадан исәплиләр. Әгәр квитанциядәге сумма шик уята икән, башта счетчик күрсәткечләрен тикшерергә кирәк: алар дөрес алынганмы, идарәче оешмага вакытында тапшырылганмы һәм хезмәтләрдән файдалану күләме артмаганмы.

Тарифлар 9% тан артык индексацияләнгән очракта, Татарстан Дәүләт торак инспекциясенә мөрәҗәгать итәргә кирәк. Халык тикшерү үткәрү өчен ведомствога мөрәҗәгать җибәрә ала. Күзәтчелек органына гариза калдырганчы, идарәче компаниядә квитанция буенча мәгълүматны төгәлләштерү киңәш ителә.

ТР Тарифлар буенча дәүләт комитеты белгечләре халыкның сорауларына түбәндәге кайнар линия телефоны буенча җавап бирә ала: +7(843)236-36-36.

Казанлыларга Казан Башкарма комитетының ТКХ комитетында да +7(843)590-04-26 телефоны буенча консультация бирергә әзерләр. Моның өчен адресны атарга һәм счет-фактураның эчтәлеген, шул исәптән фатир эчендәге счетчик күрсәткечләрен әйтеп бирергә кирәк булачак.

Торак-коммуналь хуҗалык өлкәсендә хезмәт күрсәтүләр сыйфаты буенча мөрәҗәгатьләр «Ачык Казан» системасында һәм +7(843)236-41-23 телефоны буенча кабул ителә.

Республикада торак-коммуналь хезмәтләргә (газ, җылылык энергиясе, электр, салкын һәм кайнар суга) тарифларны Татарстанның Тарифлар буенча дәүләт комитеты раслый. Ахыргы түләү торак-коммуналь хезмәтләр тарифыннан һәм аларны куллану күләменнән килеп чыга, ул счетчиклар буенча, счетчик булмаса, нормативлар буенча билгеләнә. Соңгыларын ТР Төзелеш, архитектура һәм ТКХ министрлыгы билгели.

Торак бинага һәм коммуналь хезмәт күрсәтүләр өчен түләүгә чыгымнар гаиләнең җыелма кеременнән 21% тан артык булса, социаль яклау бүлекчәләренә мөрәҗәгать итеп, субсидия алырга мөмкин.

Шулай ук укыгыз

Барлык яңалыклар