Татарстанда үзизоляция режимы вакытында 13,7 млн артык цифрлы пропуск бирелгән

Иң еш мөрәҗәгать ителгән максат буларак дачага бару танылды.

(Казан шәһәре KZN.RU, 12-нче май). Татарстанда бүгенге көннән башлап гомуми үзизоляция чорында өйдән чыгу өчен цифрлы пропускларны рәсмиләштерү буенча сервис үз эшен туктатты. 1-нче апрельдән республика халкына 13 млн 732 мең 948 цифрлы пропуск бирелгән. Иң еш мөрәҗәгать ителгән максат буларак дачага бару танылды.

Гомумән алганда, цифрлы пропусклар системасында 1 млн 737 мең 75 татарстанлы теркәлгән. Сервис эшенең соңгы көнендә, 11-нче майда, республика халкы өйдән чыгуга 464 мең 660 рөхсәт сораткан.

Сервис эшенең бөтен чоры дәвамында өйдән чыгуга иң күп ихтыяҗлы максат буларак дачага бару яки дачадан кайту торган. Бу максат буенча халык 7 млн 209 мең 217 рөхсәт сораган, бу бирелгән цифрлы пропускларның гомуми санының 53%-ын тәшкил итә.

Популярлык буенча икенче урында дарулар, азык-төлек продуктлары һәм беренче кирәк-яраклар китерү, шулай ук хезмәткә яраксыз туганнарга ярдәм күрсәтү өчен соралган рөхсәт булган. Әлеге максатта чыгуга 3 млн 623 мең 827 код бирелгән.

Өченче урынны кредит оешмаларына һәм почта бүлекчәләренә бару өчен рөхсәт алулар били - татарстанлылар 1 млн 53 мең 442 шундый цифрлы пропуск алган.

Моннан тыш, сервис эшләгән вакытта 3 мең 970 республика үзмәшгуле система кулланучылары буларак теркәлгән. Алар тарафыннан өйдән чыгуга алынган рөхсәтләрнең гомуми саны 31 мең 800 тәшкил итә. Еш кына үзмәшгульләр пропускны производство бинасына бару өчен рәсмиләштергән (бирелгән рөхсәт бирүләрнең гомуми саныннан якынча 40%).

Сервис белән бер үк вакытта эшләтеп җибәрелгән цифрлы пропусклар кайнар линиясенә республика халкыннан 260 мең шалтырату килгән, дип хәбәр итә ТР Саннар министрлыгы матбугат хезмәте.

Шулай ук укыгыз

Барлык яңалыклар