Өч ай эчендә Казанда трамвай һәм троллейбуста 4,8 меңгә якын билетсыз кешене ачыклаганнар

Контроль-ревизия эше бүлеге әгъзалары пассажирларны тикшерү эшен өч тапкырга көчәйтте

Икенче кварталда Казанның трамвай һәм троллейбусларында билетсыз 4798 пассажир ачыкланган. «Метроэлектротранс» МУП контроль-ревизия эше бүлеге хезмәткәрләре барлыгы 355 меңнән артык кешене тикшергән.

Предприятие матбугат хезмәтендә хәбәр итүләренчә, төркемнәр шәһәр электр транспорты маршрутларына көн саен чыга. Узган атнада алар 1 мең берәмлектән артык хәрәкәт составын тикшерә алды. Нәтиҗәдә 398 билетсыз кеше ачыкланган — бу пассажирларның гомуми саныннан 0,8%.

Контроль-ревизия эше бүлеге белгечләре юл йөрү өчен түләү фактын билгели торган видеотеркәүчеләр һәм терминаллар белән тәэмин ителгән. Тикшерү вакытында тикшерүче пассажирдан карта яки смартфонны соңгы түләүләр турындагы мәгълүматны укый торган һәм билет сатып алынганмы-юкмы икәнен күрсәтә торган махсус җайланмага якын куюны сорый. Акчаларны ревизор терминалы аша картадан күчерү мөмкин түгел. Хезмәткәр эшләгән вакытта валидаторлар салон эчендә блоклана, шуңа күрә пассажирлар, соңга калып, юл өчен акча түли алмаячак. Машина йөртүчегә акчалата түләгән пассажирларның кәгазь чегын тикшерәчәкләр.

Әгәр тикшерүче билетсыз кешене ачыкласа, ул аны юл йөрү өчен түләргә яки транспорттан якындагы тукталышта төшәргә сораячак. Шулай ук ревизор полиция хезмәткәрләрен чакыртырга хокуклы.

Шунысын да билгеләп үтәргә кирәк, контроль-ревизия эше бүлеге төркемнәре пассажирларны тикшерү эшен өч тапкырга көчәйтте.

Бүгенге көнгә юл йөрү өчен түләүнең кондукторсыз системасы белән барлык 244 электр транспорты җиһазландырылган.

Проектны «Метроэлектротранс» МУП «Социаль карта» АҖ, «Транспорт картасы» АҖ белән берлектә Казан мэриясе, Транспорт комитеты һәм «Ак Барс Банк» ГАҖ ярдәмендә гамәлгә ашыра. Цифрлы технологияләрне кертүгә бәйле чара кондукторлар җитмәү проблемасын өлешчә хәл итәргә һәм пассажирларга хезмәт күрсәтү сыйфатын яхшыртырга мөмкинлек бирде.

Шулай ук укыгыз

Барлык яңалыклар