Тәүлек эчендә өч казанлы полициягә телефон аша мошенниклык очрагы турында гариза белән мөрәҗәгать иткән

Җинаятьчеләрнең тәкъдимнәре барлык очракларда да бер-берсенә охшаш.

(Казан шәһәре KZN.RU, 16-нчы гыйнвар). Узган тәүлек эчендә өч казанлы полициягә телефон мошенникларын җинаять җаваплылыгына тарту кирәклеге турындагы гариза белән мөрәҗәгать иткән. Җинаятьчеләрнең тәкъдимнәре барлык очракларда да охшаш - алар зыян күрүчеләргә банк карталарыннан законсыз рәвештә акча алу мөмкинлеге турында хәбәр итәләр.

Әйтик, «Вишневский» полиция бүлегенә 51 яшьлек зыян күрүчедән гариза килгән. Ханым хәбәр иткәнчә, аңа билгесез абонент номерыннан ир шалтыраткан һәм үзен әлеге ханым клиент булып торган банкның куркынычсызлык хезмәте хезмәткәре дип таныштырган. Телефон аша сөйләшү барышында ханым счетында шикле активлык теркәлүен һәм булган акчаларны яклау өчен манипуляция ясарга кирәклеген аңлаткан. Алынган мәгълүматны яңадан тикшермичә, зыян күрүче шалтыратучының барлык кушканнарын үтәргә ашыга. Ул үзенең банк картасының барлык реквизитларын атый һәм банк тарафыннан СМС-хәбәрдә җибәрелгән барлык кодларны хәбәр итә. Нәтиҗәдә җинаятьчеләр зыян күрүченең акчасына читтән торып керү мөмкинлеген алган һәм аның счетыннан 142 мең сум акча урлаган.

Калган ике очракта зыян күрүчеләргә 50 мең һәм 28 мең сум күләмендә матди зыян китерелгән.

Шәһәрнең полиция территориаль бүлекләрендә РФ Җинаять кодексының 158 маддәсендәге «Урлау», 159 маддәсендәге «Караклык» очраклары буенча җинаять эшләре кузгатылган, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Казан полициясе шәһәр халкын уяу булырга һәм алдакчыларның хәйләләренә эләкмәскә чакыра. Товарларны интернет аша сатканда, сатып алганда банк картасына бәйләнмәгән телефон номерын күрсәтергә кирәк. Өченче затларга банк картасы турындагы мәгълүматны (карта номеры, хуҗасы турында мәгълүмат, саклагыч код һәм башкалар) әйтергә ярамый. Бер картадан икенчесенә «Мобиль банк» яки «Банк онлайн» хезмәте ярдәмендә акча күчергәндә, картаның 16 санлы номеры гына кирәк.

Караклык очрагында «02» яки «112» телефоннары аша полициягә хәбәр итү сорала.

Шулай ук укыгыз

Барлык яңалыклар