Тәүлек эчендә коронавирус диагнозы Казанның 107 кешесендә ачыкланган

Барлыгы Татарстанда COVID-19 авыруының 204 яңа очрагы теркәлгән.

Фото: Казан шәһәре KZN.RU

(Казан шәһәре KZN.RU, 7-нче декабрь). Татарстанда COVID-19 авыруының 204 яңа очрагы теркәлгән, шуларның 4-се читтән кайтучыларда, калганнары – контактлы. 68 кеше хастаханәгә озатылган, 136 кеше өйләрендә дәвалана.

Авыручылар арасында – 107 Казан кешесе, 31 кеше – Яр Чаллыдан, 7 кеше – Теләче районыннан, алтышар кеше – Әлмәт, Түбән Кама районнарыннан, 5 кеше – Чүпрәле районыннан, 4-әр кеше – Бөгелмә, Питрәч районнарыннан, 3-әр кеше – Алабуга, Зәй, Лаеш районнарыннан, икешәр кеше – Актаныш, Апас, Буа, Яшел Үзән, Минзәлә, Тукай районнарыннан, 1-әр кеше – Азнакай, Алексеевск, Арча, Әтнә, Биектау, Кама Тамагы, Норлат, Саба, Тәтеш, Чистай, Ютазы районнарыннан.

7-нче декабрьгә Татарстанда 39 мең 657 COVID-19 авыруы очрагы теркәлгән. Пандемиянең бөтен чорында 32 мең 864 кеше сәламәтләнгән, шул исәптән 241 кеше – узган тәүлектә. Татарстан Республикасының 2 млн 115 мең 923 кешесе коронавируска каршы прививка ясаткан (тәүлеккә үсеш – 26 мең 10 кеше), шулардан 1 млн 654 мең 123 кеше икенче прививканы алган, дип хәбәр итә ТР Сәламәтлек саклау министрлыгының матбугат хезмәте.

Федераль оператив штаб мәгълүматы буенча, Россиядә тәүлек эчендә 31 мең 96 яңа коронавирус авыру очрагы теркәлгән. Барлыгы илдә 9 млн 864 мең 845 кеше авырган, 8 млн 565 мең 91 кеше сәламәтләнгән.

Исегезгә төшерәбез, коронавируска каршы прививканы поликлиникаларда гына түгел, ә вакцинациянең мобиль пунктларында да ясатырга мөмкин. Алар мәдәният учреждениеләрендә, сәүдә үзәкләрендә, кредит оешмаларында һәм башка урыннарда урнашкан. Адреслары һәм аларның эш режимы KZN.RU порталында бастырылган.

Шулай ук укыгыз

Барлык яңалыклар