Узган тәүлектә Казанда 89 юл-транспорт һәлакәте теркәлгән

Юл-транспорт вакыйгасы нәтиҗәсендә автомобиль пассажиры һәм электр самокатындагы бала зыян күргән

Фото: Денис Гордийко

Узган тәүлектә Татарстан башкаласында 89 юл-транспорт һәлакәте теркәлгән. Аларда ике кеше зыян күргән: автомобиль пассажиры һәм электр самокатындагы бала.

Вакыйгаларның берсе Назарбаев урамындагы 8 нче йорт каршында теркәлгән. Беренчел мәгълүматлар буенча, 44 яшьлек шофер куркынычсыз дистанцияне сайламаган һәм автотранспорт белән бәрелешкән. Юл-транспорт һәлакәтендә 63 яшьлек пассажир зыян күргән, ярдәм күрсәтелгәннән соң, медицина учреждениесеннән чыгарылган.

М.Сәлимҗанов урамындагы 12 нче йорт каршында электр самокатында йөрүче 15 яшьлек кызны 27 яшьлек шофер бәрдергән. Беренчел мәгълүматлар буенча, ишегалдына кергәндә, ир-ат юл бирмәгән. Юл-транспорт һәлакәте нәтиҗәсендә вакыйга урынында зыян күрүчегә медицина ярдәме күрсәтелгән, ашыгыч ярдәм бригадасы соңыннан аны өенә җибәргән.

Узган тәүлектә 392 машина йөртүче һәм 187 җәяүле юл хәрәкәте кагыйдәләрен бозган өчен административ җаваплылыкка тартылган. Шуларның 39 ы – иминлек каешларын куллану кагыйдәләрен бозган өчен, 51 е – җәяүлеләргә хәрәкәттә өстенлек бирмәгән өчен, 16 сы – балаларны йөртү кагыйдәләрен бозган өчен. Биш автомобильче исерек килеш транспорт чарасы белән идарә иткән өчен тоткарланган.

Шулай ук укыгыз

Барлык яңалыклар