Соңгы атнада Татарстанда COVID-19 очрагы 26% ка арткан

Инфекция еш кына ОРВИ кебек яки симптомсыз уза

Фото: Денис Гордийко

(Казан шәһәре KZN.RU, 27 нче октябрь, Камилә Вилданова). Соңгы атнада Татарстанда 389 коронавирус очрагы теркәлгән – бу узган атнага караганда 26% ка күбрәк. Инфекция нигездә ОРВИ кебек яки симптомсыз уза, «омикрон» өстенлек итә, дип хәбәр итте «Татар-информ»да узган матбугат конференциясендә Россия кулланучылар күзәтчелегенең ТР буенча идарәсе җитәкчесе урынбасары Любовь Авдонина.

Аның сүзләренчә, ел башыннан Татарстанда COVID-19 авыруының 14 965 очрагы теркәлгән. Бу узган елның шул ук чорыннан 9,6% ка түбән. Коронавирусның сезонлы күтәрелеше алты атна дәвамында күзәтелә.

«Беренче атналарда, 35 нче һәм 36 нчы атналарда, үсеш 10% тан 16% ка кадәр булган, аннан соң ул әкренләп арткан һәм 39 нчы атнада максималь дәрәҗәгә җиткән – плюс 45%», – дип билгеләп үтте спикер.

ОРВИ авыруларының сезонлы күтәрелеше дә дәвам итә. Үткән атнада 15 390 пациент теркәлгән, бу алдагы атнага караганда 8% ка күбрәк. Грипп белән авыру очраклары ачыкланмаган.

Тема буенча материаллар:

Казан сәүдә үзәгендә грипптан вакцинация пунктлары бүген соңгы көн эшли

Гриппка каршы вакцинация әле дә бара. «Без 2 миллион 411 мең кешегә прививка ясатырга тиеш – бу барлык халыкның 60% ы, – дип искә төшерде Любовь Авдонина. – Республикага бер миллион 782 мең данә вакцина кайтты. Соңгы партияне без бу атнада алдык (340 мең). Вакциналар җитәрлек, гомуми эквивалентта бер миллион 371 мең 360 кешегә прививка ясалган, бу вакцинациягә планлаштырылган кешеләрнең 57% ын һәм барлык халыкның 34% ын тәшкил итә».

Россия кулланучылар күзәтчелегенең ТР буенча идарәсе җитәкчесе урынбасары билгеләп үткәнчә, 100% медицина хезмәткәрләре, 86% мәгариф өлкәсе хезмәткәрләре, 70% балалар, шул исәптән мәктәп укучылары прививка ясаткан. Шул ук вакытта студентлар һәм риск төркеменә кергән кешеләр арасында вакцинация җитәрлек түгел. Алар арасында 60 яшьтән өлкәнрәкләр һәм хроник авырулары булган кешеләр бар.

«Күпчелек студентлар өстәмә эшлиләр, шул исәптән җәмәгать урыннарында. Бу сәүдә үзәкләре дә, гомуми туклану объектлары да. Һәм, әлбәттә, медицина оешмаларында практикада булган медицина студентлары бар. Шуңа күрә алар прививка ясатырга тиеш», – дип чакырды спикер.

Мәгариф учреждениеләрендә элеккечә фильтрлар эшли. Гомумән алганда, 1 нче сентябрьдән 2 650 укучы дәресләрдән читләштерелгән, шул исәптән 90 ы – соңгы тәүлектә. Алар температураның югары булуы, катараль күренешләрнең симптомнарын (мәсәлән, томау яки ютәл) тапканнар. Республикада карантинда булган мәктәпләр һәм сыйныфлар юк, дип йомгаклады Любовь Авдонина.

Шулай ук укыгыз

Барлык яңалыклар