В целях анализа посещаемости и улучшения работы портала мы используем сервис «Яндекс.Метрика». Оставаясь на нашем портале, Вы выражаете свое согласие на обработку Ваших данных указанным сервисом.
Яңалыклар
14.07.2021, 16:09
Ярты ел эчендә Казанда юл-транспорт һәлакәтләре саны 6%ка, ә аларда һәлак булучылар саны 30%ка кимегән
Шуның белән бергә тиешлесез урында юл аркылы чыккан вакытта зыян күргән җәяүлеләр саны да арткан.
Фото: Денис Гордийко
(Казан шәһәре KZN.RU, 14-нче июль, Ксения Швецова). 2021 елның 6 ае эчендә Казанда юл-транспорт һәлакәтләре саны 2020 елның беренче яртыеллыгы белән чагыштырганда 6%-ка кимегән. Аварияләрдә һәлак булганнарның саны 30%-ка, ә яралылар саны 3%-ка кимегән. Әмма шул ук вакытта җәяүлеләр һәм балалар катнашында юл-транспорт һәлакәтләре статистикасы борчу тудыра. Юл хәрәкәте куркынычсызлыгын тәэмин итү чаралары бүген шәһәр комиссиясе утырышында каралды, аны Башкарма комитет җитәкчесе урынбасары – комиссия рәисе урынбасары Илдар Шакиров үткәрде.
Һәр өченче юл-транспорт һәлакәте – җәяүлеләрне бәрдерү
Ярты ел эчендә Казанда 664 юл-транспорт һәлакәте теркәлгән, шуларның һәр өченчесе – җәяүлеләрне бәрдерү.
Хокук бозучы җәяүлеләр аркасында килеп чыккан юл-транспорт һәлакәте саны 4%-ка арткан. Мондый аварияләрнең күбесе шәһәрлеләрнең тиешле булмаган урында юл аркылы чыгуына бәйле, дип хәбәр итте Россия Эчке эшләр министрлыгының Казан буенча ЮХИДИ идарәсе башлыгы Игорь Новиков. «Җәяүлеләрне бәрдерүне булдырмас өчен, без алдагы комиссияләрдә җәяүлеләр өчен киртәләр урнаштыру турында карар кабул иттек инде. Бу эшне урнаштыру максатка ярашлы булган участокларда активрак башкарырга кирәк», – дип билгеләп үтте ул.
Шәһәрлеләргә юл хәрәкәте кагыйдәләрен тайпылышсыз үтәргә һәм юл йөрү өлешен бары тик җәяүлеләр юлы аркылы гына кисәргә кирәк, дип ассызыклады И.Новиков.
Ел башыннан җәяүле балалар саксызлыгы аркасында 7 юл-транспорт һәлакәте булган
Казанда юл-транспорт һәлакәтләренең гомуми саны 6%-ка кимүгә карамастан, балалар юл-транспорт травматизмы буенча вәзгыять киеренке булып кала.
И.Новиков сүзләренә караганда, балалар катнашындагы вакыйгалар һәм анда зыян күрүчеләр саны узган елның шушы чоры белән чагыштырганда ике тапкырдан күбрәккә арткан. Әмма мондый вәзгыять күпчелек очракта узган ел балаларның дистанцион укуга күчүләре һәм юл хәрәкәтендә сирәгрәк катнашулары белән бәйле. Моннан тыш, дистанцион уку укучылар белән профилактик эш үткәрүне кыенлаштырды. Нәтиҗәдә, җәяүле балаларның саксызлыгы аркасында 7 юл-транспорт һәлакәте булган.
«Балалар катнашындагы юл-транспорт һәлакәтләренең артуы шулай ук озакка сузылган каникуллар белән бәйле, – дип өстәде Россия Эчке эшләр министрлыгының Казан буенча ЮХИДИ идарәсе башлыгы. – Ләкин бу бездән җаваплылыкны төшерми».
Узган ел ТР башкаласында 300-гә якын яшь хәрәкәт инспекторларының отрядлары формалаштырылды
Балалар катнашындагы юл-транспорт һәлакәтләре саны кимүдә мәктәп тәрбиясе аеруча зур роль уйный, дип ышана белгечләр. Казан уку йортларында, шулай ук лагерьларда даими рәвештә юлларда балаларның куркыныч тотышын кисәтүгә юнәлтелгән чаралар уза, дип хәбәр итте Мәгариф идарәсе җитәкчесе Ирек Ризванов. Аның сүзләренә караганда, укучылар өчен юл хәрәкәте куркынычсызлыгы мәсьәләләрендә грамоталылыкны арттыру буенча махсус дәресләр, тематик чаралар, шул исәптән ЮХИДИ шәхси составы белән очрашулар үткәрелә. Балаларны яктылык кайтаручы элементлар белән тәэмин итәләр – 150 меңнән артык укучы аны Яңа ел бүләкләре белән алды.
«Нәтиҗәле чараларның берсе – яшь хәрәкәт инспекторлары (ЮИД) отрядларын үстерү, – дип өстәде И.Ризванов. – Барлыгы шәһәрдә тәмамланган уку елында шундый 296 отряд эшләде, аларның составына 4394 бала керде».
Яшь хәрәкәт инспекторлары хәрәкәтенә аеруча игътибар итәргә кирәк, чөнки ул балаларны чын-чынлап кызыксындырырга һәм аларның игътибарын юл хәрәкәте кагыйдәләрен үтәүгә җәлеп итәргә мөмкинлек бирә, дип билгеләп үтте Илдар Шакиров. «Киләсе елда яшь инспекторлар турниры узачак. Казан республикада лаеклы тәкъдим ителергә тиеш, – дип өстәде Башкарма комитет җитәкчесе урынбасары. – Бу яшь инспекторларны мөмкин кадәр күбрәк балаларны җәлеп итәргә мөмкинлек бирәчәк, алар юлда үз-үзеңне тоту кагыйдәләрен өйрәнәчәк, аларны үтәүнең мөһимлеген ата-аналарына җиткерәчәк».
Уку елы башланганчы Казанда барлык мәктәп маршрутларының куркынычсызлыгын тикшерәчәкләр
Балалар белән профилактик эш бик мөһим, әмма балигъ булмаганнар катнашындагы аварияләрдә өлкәннәр гаепле, дип хәбәр итте И.Новиков. Әйтик, машина йөртүчеләр балаларны автомобильләрдә йөртү кагыйдәләрен еш боза, машина йөрү өлеше янында яки самокат һәм велосипедта йөрүче балаларны карамый.
«Балалар катнашындагы 72 вакыйганың яртысында алар автомобильләрдә әти-әниләре белән булган, – диде И.Новиков. – Балалар белән генә түгел, өлкәннәр белән дә профилактик эш җитеп бетми. Бу эшне мәктәп аша көйләргә кирәк».
Мәктәп администрацияләренең ата-аналар белән үзара хезмәттәшлеге алгоритмын булдырырга кирәк. Мессенджерлар һәм колл-үзәкләр ярдәмендә аларга юл йөрү кагыйдәләрен үтәмәү аркасында килеп чыккан аварияләр һәм аларның нәтиҗәләре турында сөйләү мөһим, дип ышана Россия Эчке эшләр министрлыгының Казан буенча ЮХИДИ идарәсе башлыгы.
Якын арада ата-аналарның җаваплылыгын арттыру өчен кирәкле чаралар турында уйларга кирәк, дип билгеләп үтте Илдар Шакиров. «Әлеге профилактик эшне оештырырга ярдәм итәрлек җаваплы кешеләрне билгеләргә кирәк», – диде ул.
Шулай ук Башкарма комитет җитәкчесе урынбасары уку елы башланганчы куркынычсызлык предметына барлык мәктәп маршрутларын җентекләп тикшерергә һәм кирәк булганда юл билгеләрен яңартырга кушты.
«Метроэлектротранс»: кечкенә генә төзексезлеге булган бер генә транспорт чарасы да линиягә чыгарылмый
Казанда җәмәгать транспорты катнашындагы һәлакәтләрне киметү эше дәвам итә. Аеруча җәмәгать транспортын йөртүчеләр гаебе белән килеп чыккан һәр авария җентекләп тикшерелә. «Метроэлектротранс» МУП борчу уята. Ел башыннан предприятиенең хәрәкәт составы катнашында 17 юл-транспорт һәлакәте теркәлгән. Проблеманы хәл итү өчен бу юнәлештә хәзер нинди эш алып барыла?»– дип кызыксынды И.Шакиров.
«Метроэлектротранс» транспорт куркынычсызлыгы буенча генераль директор урынбасары вазыйфаларын башкаручы Марсель Гомәров сүзләренә караганда, предприятие хезмәткәрләре атна саен Юл хәрәкәте куркынычсызлыгы буенча үз комиссиясен үткәрә. «Бүген предприятиедә яңа җитәкче вәзгыятьне дөрес юлга җибәрү өчен бөтен чараларны күрә, – дип сөйләде М.Гомәров. – Хәзер кечкенә генә төзексезлеге булган бер генә транспорт чарасы да линиягә чыгарылмый. Атна дәвамында булган барлык юл-транспорт һәлакәтләре комиссиядә карала, анда машина йөртүчене җаваплылыкка тарту мәсьәләсе хәл ителә».
Юл-транспорт һәлакәтендә гаепле булган йөртүчеләрне, шул исәптән финанс ягыннан да җәзалыйлар. Аларны шулай ук рейслардан алырга һәм яңадан имтиханнар тапшыруга җибәрергә мөмкиннәр. Узган атнада ике машина йөртүчене рейслардан төшерделәр һәм яңадан укуны узарга һәм имтихан бирергә мәҗбүр иттеләр, дип хәбәр итте М.Гомәров.
«Проблеманы хәл итү планы бар, вәзгыять акрынлап үзгәрә. Ел ахырына кадәр бу мәсьәләне комплекслы хәл итү өчен каралган барлык чараларны тормышка ашырырга кирәк», – диде И.Шакиров.
Казанда авария куркынычы булган 97 участок юк ителә
Авариянең төп күрсәткечләрен киметүдә «куркынычсыз сыйфатлы юллар» илкүләм проекты зур роль уйный, аның максатларының берсе – юл хәрәкәте иминлеген тәэмин итү һәм юл-транспорт һәлакәтләре концентрациясе урыннарын киметү.
«Казанда 97 авария-куркыныч участок билгеләнгән, шуларның 46-сы – юл-транспорт һәлакәтләре күп була торган урыннар», – дип искә төшерде Россия Эчке эшләр министрлыгының Казан буенча идарәсе башлыгы Александр Мищихин. Әлеге участокларда чараларны 1-нче июльгә кадәр башкарырга кирәк иде, әмма бөтен җирдә дә эшләр вакытында тәмамланмаган, дип өстәде ул һәм авария куркынычы булган участокларны бетерүне тизләтергә өндәде.
Тышкы төзекләндерү комитеты рәисе урынбасары Альберт Ибраһимов хәбәр иткәнчә, юл-транспорт һәлакәтләре күп булган урыннарны бетерү эше кысаларында 306 юл билгесе, җәяүлеләр өчен киртәләр урнаштыру, 10,19 мең кв.м авария хәлендәге юл участокларын ремонтлау һәм башка төр эшләр планлаштырылган. Моннан тыш, юл хәрәкәте схемасын оптимизацияләү өчен сигез чатта светофор объектларның өстәмә секцияләрен урнаштыру каралган.
«Юл-транспорт һәлакәтләре күп булган һәр урын буенча төгәл сроклар куелырга тиеш, аларны үтәргә кирәк, – дип килеште И.Шакиров. – Киләсе комиссиядә без бу мәсьәләне тагын бер кат күтәрәчәкбез, эш нәтиҗәләрен карыячакбыз».
Ахырда Башкарма комитет җитәкчесе урынбасары уку елы башына кадәр шәһәр җәмәгать транспортының юлларга хәрәкәт составын арттырырга кирәклеген билгеләп үтте. «Әлегә пассажирлар агымы зур түгел, әмма август ахырында укучылар һәм студентлар каникулдан кайтачак, әзерләнергә кирәк, – диде И.Шакиров. – Беренче чиратта транспорт куркынычсызлыгы мәсьәләләрен хәл итәргә кирәк».
Киңәшмәдә транспорт комитеты рәисе вазифаларын башкаручы Марат Хисаметдинов, район администрацияләре, шәһәр транспорт предприятиеләре һәм башкалар катнашты.
Фоторепортаж
Юл хәрәкәте иминлеге буенча комиссия утырышы 14.07.2021
Шулай ук укыгыз
-
25.07.2025, 17:36 -
25.07.2025, 16:54 -
25.07.2025, 16:19 -
25.07.2025, 14:57