Ярты ел эчендә 1,2 мең казанлы ВИЧ-статусын бушлай тикшергән

Меңнән артык кеше сәламәтлегенә экспресс-скрининг ясаган.

Фото: vk.com/testtowin

(Казан шәһәре KZN.RU, 29 нчы декабрь). Казанда соңгы ярты елда «Җиңү өчен тест. Ярдәм янәшә» күргәзмәсе 45 тапкыр оештырылды. Акцияләрдә үзләренең ВИЧ-статусын 1234 кеше тикшергән, шуларның 19 ы уңай статус алган.

«Җиңү өчен тест. Ярдәм янәшә» проекты эше дәвамында команда Татарстанда 61 чара оештырды, 1519 кеше тест үтте. Акцияләр барышында табиблар ВИЧ-инфекцияле 35 татарстанлыны ачыклаган, аларны дәвалау тактикасын билгеләү өчен Республика СПИД-үзәгенә җибәргәннәр.

Проект командасы,тулаем алганда Идел буе төбәкләрендә, шул исәптән Татарстанга да 124 сәфәр оештырды. Тестларны 3457 кеше үтте, шуларның 47 се ВИЧ-инфекцияле булып чыкты. 18 тапкыр тест-мобильләр Башкортстан, Удмуртия, Самара, Ульяновск һәм Оренбург өлкәләрендә булган. Бу төбәкләрдә ВИЧ-инфекцияне 704 кеше тикшергән, шуларның 16 сында уңай ВИЧ-статусы ачыкланган.

Моннан тыш, 1119 кеше сәламәтлеккә экспресс-скрининг ясаган, 1786 кеше социаль хезмәткәр белән киңәшләшкән һәм 1214 кеше ярдәм сорап психологка мөрәҗәгать иткән. С гепатитына тестны 607 кеше үтте, дип хәбәр итә «Җиңү өчен тест. Ярдәм янәшә» проектының матбугат хезмәте.

Үз ВИЧ-статусын һәм гепатит-статусын бөтен кеше дә белми һәм кеше еллар буе куркыныч вируслар йөртүче була ала, шул рәвешле тирә-яктагы кешеләрне куркыныч астына куя. Шуңа күрә ВИЧ һәм С гепатитына каршы эффектив көрәштә беренче адым – бу авыруларны вакытында ачыклау.

Шулай ук укыгыз

Барлык яңалыклар