Беренче яртыеллыкта Казанда 6 меңгә якын пар өйләнешкән

10,9 меңнән артык бала дөньяга килгән

Фото: Денис Гордийко

(Казан шәһәре KZN.RU, 4 нче август, Татьяна Марюхова). 2023 елның алты аенда Казанда 5,8 мең пар язылышкан, шуларның 3,7 меңе моны тантаналы рәвештә уздырган. Мондый мәгълүматларны милләтара һәм конфессияара мөнәсәбәтләр буенча координация советының уртак утырышында Татарстан телләре турындагы законнарны гамәлгә ашыру буенча чит ил гражданнары һәм муниципаль комиссияләр арасында хокук бозуларны профилактикалау буенча эшче төркемдә китерделәр. Ул кичә Казан Башкарма комитеты җитәкчесе урынбасары Гүзәл Сәгыйтова рәислегендә узды.

«Статистика Россиядә, шул исәптән Казанда да милләтара никахларның искәрмә булудан туктавын күрсәтә. Хәзер «милләт» бүлеген никахны рәсмиләштергәндә документларда тутыру мәҗбүри түгел, әмма, практика күрсәткәнчә, Казанда никахларның якынча 30% ы – катнаш», – дип сөйләде Гражданлык хәле актларын башкаручы Елена Студеникина

Соңгы вакытта күбрәк гаиләләр якын (Азәрбайҗан, Таҗикстан, Үзбәкстан) һәм ерак чит илләрнең (Алжир, Сүрия, Мисыр, Гыйрак) вәкилләре белән төзелә.

Елена Студеникина хәбәр иткәнчә, алты айда Казанда 10,9 меңнән артык бала туган, шуларның 4,7 меңе – гаиләдәге беренче балалар. 5,7 мең малай һәм 5,2 мең кыз дөньяга килгән. 152 очракта – игезәкләр, ике очракта өч игезәк тууы теркәлгән. 632 бала гаиләдә дүртенче һәм аннан да күбрәк бала булган.

Традиция буенча Гаилә, мәхәббәт һәм тугрылык көнендә шәһәрлеләргә «Мәхәббәт һәм тугрылык өчен» медальләре тапшыралар. Быел аны 11 пар алган, аларның фотолары шәһәрнең барлык районнарында билбордларда урнаштырылган.