2022 елда Казан аэропорты 4 миллионнан артык пассажирга хезмәт күрсәткән

Ил эчендә популяр юнәлешләр Санкт-Петербург, Махачкала, Минераль Сулар, Новосибирск булган.

Фото: Екатерина Красуцкая

(Казан шәһәре KZN.RU, 24 нче гыйнвар). Узган ел Казан аэропорты 4 млн 18 мең пассажирга хезмәт күрсәткән – Татарстан Гражданнар авиациясе тарихында беренче тапкыр шундый күрсәткечкә ирешкән. 2021 ел белән чагыштырганда, үсеш 3,7% тәшкил иткән. 12 ай эчендә барлыгы 18 мең 770 очыш башкарылган.

2022 елда аэропортның маршрут челтәрендә 90 юнәлеш булган, шул исәптән 33 халыкара. Эчке һава линияләрендә пассажирлар агымы 9,5% ка арткан – 3 млн 105 мең пассажирга хезмәт күрсәтелгән. Популяр юнәлешләр арасында Санкт-Петербург, Махачкала, Минераль Сулар, Новосибирск, Калининград һәм Сочи бар. Гадәттәгечә, Мәскәүгә очучы рейсларга ихтыяҗ зур. Россия башкаласына Казаннан 1 млн 524 мең пассажир очкан, 2021 ел белән чагыштырганда бу күрсәткеч 16,8% ка арткан.

Халыкара юнәлешләрдә пассажирлар агымы 12,3% ка кимегән – бу кайбер очышларны бетерү белән бәйле. Халыкара юнәлешләр буенча барлыгы 913 мең пассажирга хезмәт күрсәтелгән. Бодрум, Дубай, Даламан, Хургада һәм Истанбулга очышлар популяр булды, дип хәбәр итә Казан аэропорты матбугат хезмәте.

Шулай ук укыгыз

Барлык яңалыклар