10 ай эчендә Казан кунакханәләренең уртача йөкләнеше 67% тәшкил иткән

Яңа ел бәйрәмнәренә Татарстан башкаласы кунакханәләрендә номерлар тулысынча диярлек броньланган.

Фото: Марат Мөгыйнов

(Казан шәһәре KZN.RU, 19 нчы декабрь, Юлия Летникова). Агымдагы елның 10 аенда Казан кунакханәләренең уртача йөкләнеше 67% тәшкил иткән. Шул ук вакытта кунакханәләрнең иң югары йөкләнеше май бәйрәмнәрендә теркәлгән – 95%. Бу хакта шәһәр Думасының XIX сессиясендә Туризмны үстерү комитеты директоры Дарья Санникова хәбәр итте. Татарстан башкаласы кунакханәләрендә Яңа ел бәйрәмнәренә номерлар тулысынча диярлек броньланган, дип өстәде Туризм буенча ТР Дәүләт комитеты рәисе Сергей Иванов.

Бүгенге көндә шәһәрнең кунакханә фонды 229 объектны үз эченә ала, шул исәптән тулай тораклар. Аларда 16 мең 883 урынга исәпләнгән 8100 номер җиһазландырылган. Сергей Иванов Казанда еш кына зур чаралар булмаганда да номерлар булмавына игътибар итте. «Без кунакханәләр йөкләнешенең иң югары чигендә диярлек. Киләчәктә туристлар агымы артса, яңа кунакханәләр булдырырга кирәк – аларның саны ел саен 7-8% ка артырга тиеш», – дип саный ул.

Шул ук вакытта, Дарья Санникова сөйләгәнчә, туристлар еш кына арендага алган фатирларда урнаша. Мондый объектларны системалаштырып булмый – күчемсез милек хуҗалары статистика бирми, шуңа күрә Казан кунакларының бер өлешен санап булмый. Шәһәрне үстерү комитеты директоры фикеренчә, бу Татарстан башкаласы имиджына тискәре йогынты ясый.